EDITORYAL - Tensiyon sa Black Sea

Nagkainit  ang tensiyon didto sa Black Sea  region  sa Uropa tungod sa posibilidad nga pagatake sa Russia sa silingan niining nasud nga Ukraine. Layo kaayo kini dinhi sa Pilipinas apan duna kini dakong epekto.

Kini tungod kay ang Ukraine gidapigan man sa North Atlantic Treaty Organization (NATO) ilabi na sa mga dagkong mga nasud nga sakop sa maong organisasyon. Kini mao ang Amerika, Germany, ug Britain ug daghan pang uban.

Ang maong kagubot dili mahimong balewalaon lang tungod kay mga dagkong mga nasud ang nalambigit ug tanan duna silay mga diplomatikong relasyon, mga transaksyon sa negosyo, ug bisan alyansang militar.

Ang Ukraine ug Pilipinas, Russia ug Pilipinas, dunay diplomatikong relasyon. Hasta na sab sa ubang mga nasud nga sakop sa Uropa nga kadaghanan miyembro sa NATO nga natukod niadtong 1949.

Ang Russia mipadala og sobra 100 mil niini ka mga sundalo sa nasud sa Belarus nga silingang nasud sa Ukraine alang sa matud pa military exercise, apan nagduda ang US ug ang NATO nga takuban lang kini sa tinud-anay nga tumong sa Russia. Atakihon niini ang Ukraine.

Una ng giilog sa Russia ang Crimean Peninsula nga iya sa Ukraine niadtong Marso 2014.

Ang Ukraine kanhi sakop sa nabungkag na nga Union Soviet Social Republics of Russia (USSR) nga gilangkoban og 15 ka mga nasud nga gitawag og Eastern Bloc, apan kini gusto nang magpamiyembro sa NATO, apan supak ang Russia tungod nabalaka kining naa ra sa utlanan sa ilang nasud ang NATO.

Ang NATO gilangkuban kaniadto og 12 ra ka mga nasud, apan tungod sa Cold War diin padayon ang hulga sa USSR diha sa Uropa daghang mga nasud ang nagpamiyembro.

Kun magkagubot gyud sa maong bahin sa kalibotan, bisan ang mga nasud sa Asya Pasipiko maapektahan sa mga krisis, gikan sa pagkaon, petrolyo, raw materials gikan aning mga nalambigit nga mga nasud ug daghan pang uban.

Naa pa gyuy hulga gikan sa China kay basin mosalida sab kini ug atakihon ang Taiwan ug mga claimant countries sa South China Sea sama sa Pilipinas diha sa West Philippine Sea.

Makapabahin kini sa atensyon sa Amerika nga karibal sa China dinhi sa rehiyon.