Sa alas tres ang takna

May mga seminarista gikan sa Seminario Mayor de San Carlos nga mohimo sa ilang intensive pastoral immersion dinhi sa Parokya ni San Jose sa Madridejos, Alegria.

Mao nga sa ubos nga bahin na lang ko natulog. May namatngonan ko nga dunay manuktok sa akong bintana og tagtulo gyud. Subsob pud ang maong tuktok.

Nahinumdom na nuon ko sa akong gitun-an mismo nga basin may mga dautang espiritu nga naghasol kanako ning taknaa.

Hinuon ako mang gyud tupad ang rosaryohan ug kuntento lang ko sa pag-ampo niini. Reverse kini sa alas tres sa hapon nga maoy namatyan sa atong Ginoo. Hilan kining taknaa matud pa ug dinhing taknaa kusog kaayo pud ang extra ordinary diabological activities.

Apan tingali tungod pud sa akong pangedaron nga anaa sa midlife mao nga nakasinati tingali ko og sama niini.  Nahinumdom pud ko sa napatik sa facebook kanhi nga usahay ang Dios mopukaw kanato panahon sa kagabhion sanglit mao man kini ang panahon nga libre alang kanato nga makigkukabildo sa Dios.

Nunot ning maong kasinatian ko ang akong kaugalingon nga nagluya sa hilabihan. Luya kay ang mga panghitabo sa bagyo ingon man ang mga personal nga kahangawa mao man ang naglutos ning akong galamhan.

Pun-an pa sa mga pangutana kalabot sa personal nga kalambigitan sa Dios nitumaw man sa atong kaugalingon ang mga pagduda ug kawalay gana gumikan sa kahilom sa Dios luyo ning tanan natong pag-antos.

Sa makadaghan atong mapasanginlan ang yawa gumikan sa mga hitabo sa atong kinab uhi apan sayud kita dako uyamot nga ang atong paagi sa pagpili nakaapekto man sab kanato sa hilabihan.

Ang atong pagpili karon mao man ang mohulma sa atong kaugmaon.

Nibangon na lang ko gikan sa akong paghigda ug nilitok og mga pulong sa pag-ampo. Human niadto, gihimo dayon nako ang pagbasa sa libro nga dunay kalabotan sa Marxian Revolution.