Mabuhay si Sotto!

Daghan ang nakasaway sa kamandoan ni Department of Transportation (DOTr) Secretary Arthur Tugade nga dili pasakyon sa mga public transport kadtong wa pa mabakunahi.

Klaro kaayo nga ang tumong ni Tugade aron nga mapugos kadtong mga tawo wa pa mabakunahi nga sila magpabakuna na ug vaccine nga pangontra sa Coronavirus Disease.

Apan mag-unsa man unya kadtong mga tawo nga adunay sakit, nga kon sila mopugos sa pagpabakuna posible nga makapatay na hinoon kini kanila?

Wa makagusto niining maong paagi si Senate President Vicente “Tito” Sotto III kay napanglantawan niya daan nga daghan ang masakripisyo niini.

Nindot kaayo ang sugyot ni Sotto. Nganong dili man tuod imando sa DOTr, pinaagi sa Land Transportation Franchising and Regulatory Board (LTFRB), nga mag-designate og mga public transport nga para lang gyud sa mga wa mabakunahi?

Pinaagi niini, dili masakripisyo ang mga tawo nga dunay rason ngano nga hangtud karon wa sila magpabakuna. Tungod niini, nakaingon ko nga si Senador Sotto, takus gyud nga mahimong bise presidente sa nasud. Pareho gyud sila og baruganan ug ang iyang presidential candidate nga si Senador Panfilo Lacson. Para ni Lacson, kinahanglang gamiton gyud ang utok sa dili pa ipatuman ang mga plano. 

* * *

Ugma, mao na ang kapistahan ni Señor Santo Niño, ang nagluwas kanako gikan sa kamatayon dihang naligsan ko og prime mover truck didto sa Sitio Bakhaw, Barangay Catmon-daan, Catmon kaniadtong Hunyo 25, 1995. Gilatayan ang akong paagi sa pangunahan nga ligid sa higanteng cargo truck, apan tungod sa milagro ni Santo Niño, wa mabali ang akong bukog ug wa ko mamatay.

Kada higayon nga magsaulog si Santo Niño sa iyang kapistahan matag ikatulong Domingo sa Enero, mahandom gyud nako ang pagluwas kanako gikan sa kamatayon.

Kaniadtong Marso 26, 1981, dunay mihatag kanako og imahen sa Balaang Bata, ug gikan niadto, giyukboan nako kini kada adlaw.

Paglabay sa 14 ka tuig, gibugtian ni Santo Niño ang pagyukbo ko kaniya sa daghang katuigan.

Dihang nagpaingon na kanako ang higanteng sakyanan samtang naghigda na ko sa karsada tungod sa aksidente, misiyagit ko og pakitabang ni Santo Niño, ug iya gyud ko nga giluwas.

Gilatayan man tuod ko sa dakong ligid sa prime mover truck, apan igo ra nga nagisi ang akong karsones, ug wa mabali ang akong kabukogan.

Ang mga nakakita kanako sa maong higayon, wa makatuo sa ilang nakita. Mibangon ko gikan sa karsada nga daw wa ra’y nahitabo.

Karon, hugot na kaayo ang akong pagyukbo ni Santo Niño nga gihimo ko na nga idolo, manluluwas ug kanunay’ng motabang sa akong panginahanglan.

Viva Pit Señor!!!