Taras sa tihik

Disyembre na usab. Dili mapugngan, moabot na usab ang pagsaulog nato sa Pasko.

Kaniadto sa wala pay pandemiya, diin himsog pa ang kompaniya nga akong gialagaran, buhong kaming empleyado sa Christmas bonus.

Happy kaayo among Christmas. Usab, ang mga mamaskohay, kinsa nakatilaw sa abundang grasyang hinatag sa Ginoo nga among gipaambit kanila.

Pero dihang giataki sa COVID-19 ang tibuok kalibotan, diin among kompaniya, usa sa mga establisamentong nasirhan-apektohan, naaghat kog hunong sa pagtrabaho, bisag dili pa unta angay.

Hinungdan, nga matag abot ning bulan sa Disyembre, igo na lang kong mopatulo sa mga luha samtang naghandom niadtong naagiang kahamugaway nga daw nahisama sa damgo na lang, dili na nako mahikap, ni maangkon!

Mas maayo pa ang mga front liner ug health worker kay wala gyod mahunong ang ilang panrabaho. Bisan tuod sila dili well-compensated, at least, hangtod karon may ‘kita’ pa sila nga ikagasto sa mga panginahanglan sa ilang pamilya. Unta, isip modern heroes, padak-an na ilang suweldo sa atong gobiyerno.

Hinuon, may pipila kanila nga dugay na sa serbisyo ug dakodakog suweldo. Sama sa giasoy diri nako sa usa ka nutritionist-dietician, kinsa mitug-an, nga sa ilang departmento may kauban silang dato. Gikan sa mga gamit niini ngadto sa pagkaon, halos tanan mahalon.

Gani, panahon sa ting-snack, Nutela chocolate spread man ang pirmeng ipahid sa bawon niining slice bread. Ang nakaparat lang, kay puwerte kunong tihika. Di gyod kaantigo mangagda nila.

Pero usa ka higayon niana, nakurat sila dihang pagsulod pa lang nila sa opisina gihatagan sila sa tihik og usa ka dakong garapon sa Nutela. Labihang lipaya nila.

Nagtampotampo dayon sila para ipalit og slice bread. Apan naunsa ba, nga pag-abli nila sa Nutela, gahi man kaayo kutsaraon ang sulod? Gisulayan nilag tan-aw ang garapon. Sinaw ug mamords man! Pero pagsusi nila sa expiry date? Pastilan, expired na man diay kini!

Nagsingabot na ang Pasko. Ayaw puy-i ang kinaiya sa tihik. Kon kita manghatag og gasa, seguroa nga ang pagkaong itunol, limpiyo-makaon pa. Kon used clothing or any used material ang itunol, dapat walay tatsa ug mapuslan pa. The best, kon sana all, brand new!  Kay ikalipay gyod kini sa atong Ginoo.