Iresponsable

Daghan ang wala makauyon sa seryosong pamasangil nga gihimo ni Kongresista Bebot Abellanosa diha sa iyang post sa Facebook atol sa pag-ulbo sa dakong sunog niadtong Biyernes sa hapon didto sa Sitio Lawis, Barangay Mambaling.

Sa iyang post sa Facebook matud ni Abellanosa: "BREAKING NEWS!

Dakong sunog karon sa Mambaling. Daghang firetrucks wala ka responde kay gigamit sa mga routa sa funeral procession ni Mayor Edgar Labella, nahutdan ug tubig kay gigamit sa water salute pag-agi sa patay nga lawas."

Ang mga netizens nga nakabasa sa post sa kongresista nakasaway niini. Ilang gihulagway nga insensitive ang iyang gihimo ug nagpakita sa ka way respito ngadto sa mitaliwan na nga opisyal.

Tungod sa negatibong reaksiyon napugos si Abellanosa  pagpasabot diha sa samang post sa Facebook nga wa siyay intensiyon nga ipakaminus ang paghatag og pasidungog ngadto sa mitaliwan nga mayor.

"P.S. Klaripikasyon: With due respect, walay intention to question or to dishonor sa gihimo nga paghatag ug final honors alang kang Mayor Labella.

Ang atong gi question dinhi ang organizer - sa dakong sayop sa pag gamit sa mga firetrucks sa maong okasyon, labi na nga naatol sa pagbuto sa sunog sulod sa akong distrito.

The readiness to respond to emergency has been hampered. It is unlawful to use public emergency facilities like firetrucks for purposes other than saving lives and properties.

Responsible city government officials should not have allowed this in the first place. It is not in accord with Republic Act 10121."

Apan inay pagsalbar sa iyang kaugalingon sa dakong sayop nga nahimo, mas misamot hinuon siya og unlod sa dugang mga pamahayag nga iyang giluwatan sa pamasin nga ipasabot ang iyang palpak.

Kini tungod kay di lang ang namatay nga opisyal maoy nabiktima sa iyang kairesponsable kun dili lakip na ang mga opisyal sa dakbayan nga nagplano sa kalihokan pagpasidungog kang Labella ug ang kabomberohan sa dakbayan.

Pasayloa nga iresponsable maoy akong nahunahunaang pulong paguilagway sa gihimo ni Abellanosa tungod kay way laing haum nga pulong alang niini.

Angkonon man niya o dili apan ang naghingapin nga pamolitika tataw nga maoy nagtukmod niya pagluwat sa iresponsableng pamahayag sa way pagsusi sa kamatuoran.

Ang tinuod mao nga alas 3 pa nahuman ang funeral procession ni Labella. Ang sunog sa Mambaling niulbo pasado na alas 5 sa hapon.

Hain man dapita naatol ang sunog samtang gigamit alang sa paghatag og pasidungog ni Labella ang mga firetruck sa kabomberoha?

Gawas nga wala magtakdo ang oras sigun sa pamasangil ni Abellanosa, di sab tingali ingon ana ka bugok ang kabomberohan sa dakbayan nga way contingency plan kun mahitabo man galing ang emerhensiya dungan sa maong kalihukan.

Gani sigun sa report sa kabomberohan 40 ka mga firetruck ang mirespondi sa sunog nga miugdaw og labing minus 300 ka mga panimay.

Ang angayang buhaton ni Abellanosa inay suwayan pagpasabot ang iyang kaugalingon, mas masabtan siya ug mapasaylo sa iyang ka iresponsable og moangkon sa iyang sayop ug mangayo og pasaylo.