EDITORYAL - Political survival

Samtang nagkaduol na ang kampanya ug sa mismong piniliay sa sunod tuig, nagkaanam na og iyahay og pahiluna ang mga nagkadaiyang politikanhong partido kun asa mopalandong.

Managlahi ang ilang tawag sa ilang gibuhat depende kun kinsa nga representante sa partido nga  pangutan-on, dunay miingon nga alyansa, panaghiusa, o kowalisyon. Apan pagkatinuod panagana kini ugaling makadaog ang ilang gisakyan.

Hinuon wala man tingali politikong gustong mosulod sa usa ka kowalisyon kun wala sila makakita og tsansang may purohan kining modaog.

Ning bag-ohay lamang nagtigum ug naghiusa ang mga nagkalain-laing politikanhong partido ug nakig-uban sa pundok nilang kanhi senador Ferdinand “Bongbong” Marcos Jr. ug ni presidential daughter, Davao City Mayor Sara Duterte-Carpio.

Kaning mga partidohang nakig-alyansa kanila dunay mga gipadagan nga kandidato apan wala silay lig-ong manok para sa mas taas nga posisyon. Ang uban, mga lokal lamang gyud nga kandidato ang ilang gisaligan.

Nindot man gud ning duna kay dapigang kandidato sa national level kay dunay sagol garbo nga usa mi sa mga nipaluyo aning kandidato karon sa pagka-presidente ug bise presidente uban sa ilang mga senador.

Sa habig sa mga kandidatong gipaluyohan makatabang kining mga nisampa kanilang mga partido sa local campaign ini unya og sugod na sa kampanya.

Kahinumdoman nga sa wala pa magsugod ang pagduso og certificates of candidacy sa mga buot mokandidato, si Bise Presidente Leni Robredo miduol sa tanang mga oposisyon sa tinguhang mag-usa sila sa 2022 election batok sa bisan kinsang kandidato sa administrasyon.

Apan walay nahitabo tungod kay tanang iyang gipangduol dili interesado. Silang tanan gusto sab makalingkod sa Malacañang ug niabot pa gani sa punto nga dunay nagdinaotay sa usa’g-usa.

Sa sinugdanan, daw nagkayagaw ang kampo sa administrasyon kay pwerteng daghanang nanagan ug gipuntariyang posisyon sa national level.

Tanang partido karon gusto og “political survival” ini unya og duna nay mapili human sa eleksyon. Lisod kaayo nga adto ka mapunta sa pildihonong partido, mao bitaw nga sagad aning mga ingon niining “alyansa” anha mahitabo ini og hapit na ang aktwal nga kampanya.

Hinuon ang mga maalamong botante  ra gihapon maoy mobotar kun tan-awon gyud nilang og tarong ang ilang pilionon.