EDITORYAL - Bakuna mao ray kagawasan

Walay laing pamaagi aron makabaton og kagawasan gikan sa pandemiya ang nasud kondili ang pagpabakuna ra gyud sa mayoriya sa populasyon niini.

Sugod niadtong bulan sa Marso ning tuiga gipaspasan sa gobiyerno ang pagpamakuna sa tinguhang mabakunahan ang 70 porsiyento sa populasyon karong tuiga aron makab-ot ang gitawag nga herd immunity.

Duna nay dul-an 34 milyones nga kompleto og bakuna batok sa coronavirus disease samtang 43 milyones na sab ang nakadawat sa ilang unang dose.

Kun makompleto lang ang bakuna aning 43 milyones karong tuiga, sobra pa sa target nga 70 porsiyento ang makab-ot sa nasud, apan lisod kining kab-uton tungod kay lahi-lahi man ang eskedyul sa pagdawat sa ikaduhang bakuna. Usa pa, magagad kini sa gidaghanon sa mga vaccination sites ug sa tigpamakuna sa maong mga sites.

Mokabat na og sobra 76 milyones ka doses sa bakuna ang nahatag sa gobiyerno.  Ang Pilipinas nakadawat og 124 milyones ka doses nga bakuna, ang 90 milyones niini pinalit sa gobiyerno ug ang sobra gikan sa mga donasyon.

Duna pay umaabot nga dul-an sab usa ka milyon nga doses sa bakuna sa mosunod nga mga adlaw.

Mao sab kini ang hinungdan nga hasta ang mga kabataan gikan 12-anyos hangtud 17-anyos giapil na karon sa vaccination rollout sa gobiyerno.

Ning bag-ohay lang usab, gipahibalo sa Department of Health nga nagtinguha na sab silang maapil sa pagpamakuna ang 13.5 milyones nga mga batang nag-edad og 11-anyos hangtud 5-anyos.

Apan samtang tuod maayo ang dagan karon sa pagpamakuna sa Pilipinas, duna gihapoy mga pagduhaduha ug kabalaka nga mahisama ang nasud sa ubang mga nasud nga nakasinati og COVID-19 surge bisan og daghan na sa ilang populasyon ang nabakunahan.

Hinuon pasalamat nalang sab tingali ang Pilipinas tungod kay paspas ang pagpamakuna dinhi ug mismo ang indepentdenteng OCTA Research Group namahayag nga wala silay nakitang kahigayonan nga mahisama ang nasud sa uban tungod niini.

Mas gikinahanglan gyud sa mga Pilipino nga magpabakuna batok sa maong sakit ilabi na nga giablihan na og balik ang ekonomiya. Nakita nga tungod sa bakuna nimenus ang mga natala nga bag-ong kaso ning nanglabay nga mga semana.