Si SP Sotto ang makabenepisyo

Miduso na sa iyang Certificate of Candidacy (COC) sa pagka bise presidente sa nasud ubos sa partidong Lakas Christian Muslim Democrats (Lakas-CMD) si Davao City Mayor Sara Duterte Carpio, anak ni Presidente Rodrigo Roa Duterte.

Magpapili usab sa pagka bise presidente si Presidente Rodrigo Roa Duterte, amahan ni Sara Duterte Carpio.

Si Senador Bong Go mibakwi sa iyang kandidatora sa pagka bise presidente ug mao na ang magpapili sa pagka presidente. Si Presidente Duterte mao ang iyang bise presidente.

Sa ilogay sa posisyon sa pagka bise presidente nakapabor og samot si Senate President (SP) Vicente “Tito” Sotto III tungod sa panag-unay sa amahan ug anak sa nahisgotang posisyon.

Ang mga dumadapig ni Mayor Sara Duterte makuhaan tungod kay ang ilang gusto nga daganan sa mayor mao ang posisyon nga presidente. Mao usab ang mga dumadapig ni Presidente Duterte. Ang iyang mga dumadapig dili na kombinsido nga mahimo pa niya ang iyang gustong himoon kun mapili siya nga bise presidente kay wala man gani niya kini mahimo nga presidente na siya.

Ang mga dumadapig ni SP Tito Sotto nagpabiling solido. Mao usab ang mga dumadapig nila ni Senador Kiko Pangilinan, Dr. Willie Ong, Congressman Lito Atienza ug ubang mga kandidato sa pagka bise presidente. Makuhaan man seguro ang ilang mga dumadapig pero dili sama ka daghan sa makuha sa mga dumadapig sa amahan ug anak nga parihong magpapili sa pagka bise presidente.

Apan sa survey nga gihimo sa Social Weather Stations (SWS) niadtong Oktobre 20-23, 2021 alang sa pagka bise presidente sa nasud si SP Vicente Sotto III nakakuha og 44 porsiyento. Nagsunod kaniya si Mayor Sara Duterte Carpio nga nakakuha og 25 porsiyento, Senador Kiko Pangilinan ug Dr. Willie Ong nga pulos nakakuha og tag 13 porsiyento, Congressman Lito Atienza nga nakakuha og 3 porsiyento ug 2 porsiyento ang wala pa makadesider.

Dinhi maingon nato nga misamot ang pabor ni SP Vicente “Tito” Sotto III kay siya ang makabenepisyo sa nag-unay nga amahan ug anak.