Sense of entitlement

Daghang mga tawo karong mga panahona ang nagtuo nga sila entitled ra kaayo. Entitled tungod kay buot silang mo-enjoy bisan dili sila mobayad ni mohatag sa ilang tampo.

Dunay uban nga anaa sa gahum nga buot na lang gyud nga magpabilin. Kadtong mga tawhana bisan walay nahimo alang sa katilingban mao man kadtong mga tawo nga gigamit lamang ang ilang salapi ug kasikat ingon nga sukaranan diha sa  ilang pagdumala.

Kun kini mao ang gipakita sa mga lideres mao usab kini ang gipakita sa ilang mga sumusunod. Ning paagiha nahimong daw haguka ang tanan. Ang tanan nga desisyon pinasikad lamang sa popularity. Bisan pa man kun kawatan ka o plunderer ka mamahimo kang mapili kun sikat ka. Ang tawo gyud pud intawon.

Sa laing bahin, dunay mga tawo tungod kay sila edaran na ug hataas na og katuigan sa panerbisyo buot naman nuon magpatahud taman sa ginhawa. Daw balaod alang kanila nga paminawon gyud ang ilang tingog.

Tungod kay lagi libre ug dili makagasto mao nga maminaw lang gyud intawon ang mga hingtungdan. Entitled nga paminawon kuyog niadtong mga tawo nga entitled usab nga librehon.

Paila lamang kini nga utilitarian gyud ang kalibutan. Sa ato pa mapuslan gani ang tawo maayo pa kaayo ug kun dili nan, nahimong daw walay hinungdan ang tanan.

Ang atong Ginoo wala moanhi dinhi aron alagaran apan nianhi siya aron moalagad. Subo lang palandungon nga nahimong kabahin sa atong bayanihong panumdoman lamang apan ang paghimo niini ingon nga sukaranan sa inadlaw nga kinabuhi nahimo man lamang ingon nga usa ka publicity stunt. Hinumdumi dili tanang popular mahimong dawaton. Ang uban nila pangilad lamang sa atubang.