Ang lipat-lipat

Kun wala ko masayop daghan ang nalipay dihang gipahibawo ni Bohol Governor Arthur Yap nga wala na kinahanglana ang negatibong resulta sa RT-PCR Test niadtong mga gustong mobiyahi sa lalawigan sa Bohol nga mga bakunado. Mao ni ang nakab-ot nga kasabotan sa mga opisyal sa Bohol ug Inter-Agency Task Force sa lalawigan.

 Ang himoon sa mga biyahiro mao kining mosunod: kun bakunado sa gawas sa lalawigan sa Bohol mopakita sa una, Vaccination Certificate nga gikuha gikan sa vaxcert.doh.gov.ph ug 2. Aprobado nga S-Pass Travel Coordination Permit.

 Nindot nga paminawon ang gibandilyo ni Gobernador Arthur Yap ug malipay gyod ka labi na kun nagpanikad na ka sa pagpauli sa Bohol. Simple ra gyod kaayo kun imong tan-awon ug paminawon ang gikinahanglan nga requirement kun mobiyahi ka sa Bohol.

 Akong gibisita ang vaxcert.doh.gov.ph apan akong nahibaw-an nga ang maong website para lang niadtong mga mobiyahi sa gawas sa Pilipinas. Sa akong pag abli sa Website gimandoan ko sa pagpili sa Yes kun usa ko ka international traveler o OFW nga kompleto na sa bakuna nga mobiyahi sa gawas sa Pilipinas sa mosunod nga duha ka semana.

 Kay dili man ko moadto abroad kay mouli ra man ko sa Bohol busa akong gipili ang No. Pagpili nako sa No, giingnan ko nga ang Portal kasamtangan pa lamang nga gilusad nga nakatotok lamang sa mga OFW ug international travelers.

 Inig kuha pod nimo sa S-Pass Travel Coordination Permit pangitaan pod ka og negatibo nga resulta sa RT-PCR Test.

 Lipat-lipat o gilipat lang ta ni Gobernador Arthur Yap sa lalawigan sa Bohol. Seguro wala marehistro sa utok sa gobernador ug sa IATF sa Bohol nga dili tanan mobisita sa Bohol mga OFW ug international travelers. Seguro ang narehistro sa utok sa gobernador ug sa IATF sa Bohol ang dolyar nga dala sa mga International travelers ug OFW. Diskriminasyon.