Ilang immunity batok Pres. Duterte
Bisan di niya angkonon segurong gisakitan si Presidente Rodrigo Duterte sa pagbarug sa mga doktor batok sa ilang giisip nga sayop niya nga pagduma sa pandemiya sa COVID-19 ug pagbabag sa imbestigasyon sa gipasangil nga mga anomaliya sa pagpamalit og personal protective equipment (PPEs) ug ubang mga transaksiyon sa iyang tinudlong mga opisyal ug paboritong mga negosyante.
Kay ang mga doktor apil sa nangampanya para niya niadtong 2016. Maong di malalis nga nakatampo sila sa mandato nga kanunay niyang isagpa ni bisan kinsang mokuwestiyon sa mga lakang sa iyang pamunoan.
* * *
Lahi sa ubang nisukwahi niya, ang mga doktor di mahimo nga insultuhon, binastosan ug hudlaton ni Presidente Duterte. Kay nahinayak na siya og pasidungog nila isip mga bayani sa pandemya. Bahala na kon wa niya sila hatagi sa tukmang mga benepisyo, ang pagbalikas nila makabisto nga ulug-ulog ra diayng iyang pagdayeg sa dako nilang sakripisyo pag-atiman sa mga pasyente sa COVID-19.
Maong kutob sa mahimo magpakahilom siya. Pasagdan ang iyang mga turutot nga mobawos pagsabon sa mga doktor. Wa hinuon igdungog ang presidente nga makatak-om og dugay sa hugaw niyang baba.
* * *
Mas nakapasakit sa wa paabotang pangisog sa mga doktor, nga nisunod sa pagsugod sa pormal nga imbestigasyon sa International Criminal Court sa mga pasangil sa crimes against humanity batok niya ug pagdaog ni Maria Ressa sa Nobel Peace Prize, maong di malalis nga kamatuoran: Nahibawo sila sa ilang gipanulti.
Ang ilang pasangil nga di kamao ang mga tagduma sa kampanya batok sa COVID-19 ug nga ang iyang mga lagda sukwahi sa siyensiya mas katuohan kay sa palusot sa iyang sinaligang mga heneral, negosyante ug politiko.
* * *
Kon iyang tumanon ang awhag sa mga doktor, padayong piyestahan ang surambaw nga mga transaksiyon sa iyang mga tinudlo sa Department of Budget and Management ug sa kinaham niyang mga negosyante sa Pilipinas ug China nga gipangulohan ni Michael Yang.
Kinahanglan nga iyang ilumpong ang mga doktor sa mga grupong iyang basulon sa higanteng krisis nga iyang gipasidaan. Unsaon niya pag-atake ang kaligdong sa mga doktor, nga naglakip sa lima ka kanhi health secretaries, ug usa nila iyang tinudlo? Mas maayong pangutana: Mopakpak bang katawhan sa sunod niyang salida?
* * *
- Latest
