Gipaabot dugang buot moalagad sa lungsod mo-file sa COC

Kinaiya natong mga Pinoy (ambot kinsay nagtudlo nato niini), sa bisan unsa natong buhatan, mag-last hour, o mag-last minute gyud ta. Dili kina molihok dihadiha dayon.

Karong adlawa ang katapusan pag-file sa mga certificates of candidacy (COC). Gihatagan kita’g walo ka adlaw, apan sa una o ikaduha hangtud sa katulong adlaw, medyo mingaw ang Comelec, kay kasagaran sa buot moalagad sa lungsod naghuwat sa katapusang adlaw. Magpa-thrilling pud.

Atong makita nga daghan diay kaayo ang buot mag-antos ug magsakripisyo, ug mogasto’g daghang kwarta  aron moalagad sa lungsod. Dili baya tiaw ang pag-alagad sa lungsod. Imagine himuon kang suloguon sa lungsod, public servant. Laliman ka ana?

Apan, nalipay kita nga daghan diay kaayong gustong mualagad sa lungsod. Daghan ang gustong magpasugo sa lungsod. Sa Amerika, duha ra man ka tawo ang gustong mag-presidente. Dinhi sa ato porbidang daghana. Buot bang ipasabot nga mahigugmaon kita sa nasud kay sa mga Amerikanhon?

Anyway, giingon nga ang duwa sa politika sa atong nasud, dili ang pag-file sa mga COCs, kundili sa adlaw unya sa substitution. Gipaabot nga dunay mang-withdraw, ilabina na niadtong nakakita nga pildihunon, ug natural, adunay mo-substitute, kadtong naghiluhilom lang una, apan, gituboy sa katawhan. Nia dinhi ang thrilling, ang kulba-hinam, kay between now ug sa last day sa substitution (December man tingali), daghan pang manghitabo, daghan pang re-negotiation ug pag-compromise.

Laing hinungdan nga ang uban maghuwat sa petsa 8 tungod kay swerte kono ni nga number.

Ang Provincial Election Supervisor, si Lionel Marco Castillano nagkanayon, sumala sa napatik sa The Freeman: “Daghan kaayo tinuohan ang mga kandidato. Ang atong last day petsa 8 gud, it is supposed to be a lucky number sa Chinese, so ang uban sad seguro they need time makahibalo kinsa ilang kontra.”

May pagka-true. Duna koy amigo nga nagparehistro sa iyang sakyanan. Pagbalik sa iyang gisugo nga nagdala na sa bag-ong plaka, hilabihan niyang sukoa ug iyang gipabalik ang plaka ngadto sa LTO kay pailisdan nga dunay number 8. Lagmit kon nagkandidato pa kini siya karon, usa usab siya sa naghuwat sa petsa 8. Ang uban nga sa ilang tan-aw dumadaug gayud sila, wala maghuwat sa petsa 8, kay ang ilang pagdaug wala mag-agad og swerte.

Apan, mipahimangno si Castillano nga dili maghuwat sa last hour gayud kay tingalig dunay mga corrections, ug maabtan unya sa pagtak-op sa registration. Kinahanglan nga kompleto gayud ang pagsumetir sa mga papeles.

Ug aron pagseguro nga madawat gayud on time, bisan o duna pay mga kulang og mga corrections ang mga papeles, wala unta mo maghuwat karong adlawa, kundili, ni-file unta mo gahanpon, petsa 7, kay duna pa untay igong panahon paghimos sa mga corrections kon duna man. After all, ang numero 7, naila man pud nga lucky 7.

Dugang ni Castillano: “Hopefully, ayaw tong kung alanganin na pud kaayo ka last day, naa pud sipyat sa imong COC wala nay panahon pag correct kay dili baya gyud ipadawat sa amo ang incomplete COC.”