Mga arkitekto sa pagtuo sa Ginoo

“God if my reason is selfish don’t make me top” mao kini ang gisaysay sa top notcher (first placer) sa architect licensure examination nga si Benson Heinrick Booc Go sa University of San Carlos kinsa nakakuha og 83.50 percent nga passing rate.

Nindot kaayo paminawon gikan sa usa ka humble person kinsa akong nahinabi niadtong nakalabay’ng semana.

Dili matukib ang iyang kalipay dihang nasayran nga nakapasar siya sa board exam ug misamot pa dihang nakita nga anaa sa number one ang iyang ngalan nga maoy nakaingon sa pagtulo sa luha sa iyang mga mata.

Kong nalipay siya mas sangko sa langit ang kalipay sa iyang pamilya ilabi na sa iyang mga ginikanan.

Matud ni Benson nga target na niya kaniadto nga mag-number one sa board exam tungod sa mga personal nga interest. Apan nakamatngon siya nga selfish man ang iyang rason busa nausab ang iyang desire ug gisalig sa Ginoo ang tanan.

Atol sa iyang pagpamalandong giestorya niya ang Ginoo nga kuhaon ang iyang desire nga mag-number one kong gipaagi kini sa kahakog.

Aktibo si Benson sa ilang simbahan ug kanunay niya nga gihimaya ang Ginoo sa matag panghitabo sa iyang kinabuhi. Busa dili ikahibulong nga gihatagan siya og grasya diin wala lang ihatag kon dili naa pay bonus nga mao ang mag-top one.

Samtang naila ila usab nako ang second placer or top 2 nga si Mark Anthony Veloso Flordelis nga classmate usab ni Benson sa USC.

Hilabihan ka humble nga tawo, mauwawon apan maantigong moatubang sa mga tawo nga iyang gikahimamat.

Matod ni Mark nga ang gipangayo niya sa Ginoo nga makapasar sa board exam ug kong pakapinan nga mag top, gusto niya nga mag top 2 lang.

Dihang naminaw ko niya nakugang ko kay kasagaran nagtinguha man gyud nga mag top 1 apan si Mark kontento na siya sa number 2 kay alang kaniya pressure kaayo kong naa sa number 1.

Ang iyang gipangayo gihatag gyud ug giuntop nga anaa sa second place nga naghatag og dakong kalipay ug garbo sa iyang pamilya.

Walay “panghihinayang” sa tinagalog pa si Mark nga number 2 ra ang iyang gipangayo tungod kay alang kaniya ang number one mao ang iyang dako nga pagsalig sa Ginoo.

Silang Benson ug Mark parehong nakasinati og mga pagsuway ilabi na sa ilang OJT period kay naatlan man og pandemic. Apan nalatas nila ang tanan tungod sa pagsalig sa Ginoo inubanan sa ilang paningkamot.

Labaw sa tanan ang ilang hugot nga pagtuo sa Ginoo ang angayan nga himoong sumbanan ilabi na niining panahon nga nakasinati og grabeng pagsuway ang kalibotan tungod sa epekto sa pandemiya.

Kong ibutang nato ang Ginoo kanunay sa atong kaugalingon ug gamiton kini dili sa personal nga interest kon dili alang sa mga tawo nga naglibot kanamo nga atong maalagaran, segurado nga ihatag Niya ang ang gitinguha sa atong kasingkasing in His glory.