Malisod rong panahona

Gisugdan na usab dinhi sa among parokya ang laing hugna sa mobile procession uban sa among segunda patron San Roque.  Tumong ug tuyo niini dili lang kalabot sa nagsingabot niya nga pangilin kondili tungod kay dako ang among pagtuo nga siya ingon nga patron sa pandemiya makatabang dako uyamot aron mahunong kining dakong peste nga padayong naghasol kanato hangtud karong mga higayona.

Malisod man tuod apan kinahanglan nga huptan gihapon nato ang pagsalig nga dunay maayo nga mahitabo luyo ning atong mga pag-antos karon.

Kon atong himoon ang pagbalik lantaw sa kinabuhi ni San Roque, siya usab nahimong biktima sa malisod nga kinabuhi gumikan sa peste usab nga nahitabo sa iyang kapanahanan.

Matud pa, daghang mga tawo ang natakboyan sa maong peste ug gani, daghan gyud kaayo ang mga nangamatay.

Siya mismo sa iyang tinguha nga mamahimong makatabang sa mga nagmasakiton ang wala usab makalingkawas sa kahimtang. Siya usab natakboyan.

Sa pagtuo nga siya mamatay na ang nihukom nga moadto sa lasang aron didto paabuton ang iyang kamatayon sa walay paghasol sa uban.

Ug matud pa sa sulugilanon, dunay iro nga mag-adtoan aron dad-an siya og makaon hangtod siya mabaskog.   Hangtod sa iyang kamatayon, nagpabiling mapaubsanon si  Roque nga bisan gani ang iyang kaugalingong uyoan ang wala man makaila kaniya.

Tinuod daghan nato ang naapektohan ning hitaboa karon. Malisod man tuod apan angayan gihapon kitang manlimbasog kuyog niini ang pagmatngon ug pag-atiman sa atong kaugalingon.

Unta pinaagi sa pangama ni San Roque mahilayo unta kita sa daghang mga peste sa kinabuhi, lakip niini ang coronavirus nga naumol sa China ug padayong nagdala og kahasol sa kinabag-an.