Kinsa’y dumadaog?

May mitug-an nako nga si kanhi konsehal Mary Ann Delos Santos maoy kandidato sa BOPK pagka kongresista sa Cebu City north district.

Unya, kay si Rachel “Cutie” Del Mar nga anak ni kanhi Kongresista Raul Del Mar modagan man sab gyud sa katungdanan puli sa iyang papa, buak ang botos sa BOPK.

Kon kini ang mahitabo, paminaw ko motalidhay pag-ayo si Konsehal Niña Mabatid nga maoy kandidato sa Barug-PDP sa pagka kongresista sa north district.

Pananglit ako maoy pangulo sa BOPK, timbang-timbangon nako pag-ako kon kinsa kanila ni Delos Santos ug Del Mar ang lig-on ug makatabang sa grupo.

Ang usa kanila nga dili mapilian, mas maayo nga iapil sa han-ay sa mga kandidato pagka konsehal sa north district.

Sa south district hinuon, lig-on sab si kanhi mayor Tomas Osmeña ug kon madayon nga si Konsehal Edu Rama ang iyang kontra, mora’g dili kaayo siya maglisud.

Apan dili angay’ng mokumpiyansa si Osmeña kay ilado ang bansagon nga Rama, ug kon mokumpiyansa siya, basin og magkamayokmok ang simod niya nga mamusmos sa kapildehan.

Pagka mayor, aw fight man sila si Vice Mayor Mike Rama ug Kongresista Bebot Abellanosa. Pagka bise mayor, fight sab sila si Raymond Garcia ug Franklin Ong kay pareho man sila nga mga konsehal sa siyudad.

* * *

Ang mga grupo nga misuporta kaniadto ni Presidente Duterte, karon nagkahiusa sila pagbalik aron suportahan si Davao City Mayor Sara Duterte kon mopapili kini pagka presidente sa eleksyon karong sunod tuig. Matud ni Winley Dela Fuente, ang deputy secretary general-Visayas sa Run Sara Run, gitawag nila ang grupo nga Sara All Philippines 2022.

Way giila nga lider sa ilang unity group aron malikayan ang selos. Ang lider sa masi’g ka grupo mao ra ang modumala sa ilang tagsa-tagsa ka kahugpongan.

Karon nakasabot na ko, sila diay maoy naghimo og kalihokan nga “Run Sara Run” sa lainlaing dapit sa nasud. Tan-aw nako, tingali makumbinser na gyud nila niini si Inday Sara nga modagan pagka presidente. Kada usa ka grupo, dunay representasyon sa National Coordinating Council sa ug sa National Coordinating Secretariat nga adto temporaryong magbase sa Davao.

Ang maong grand alliance maoy magsabot og pamaagi ug mga kalihokan sa ilang grupo. Bisan wa pa mohukom si Inday Sara nga modagan, naglihok na ang makinarya sa grupo.

Mura’g kulbaan niini ang ubang nagplano pagdagan pagka presidente. Ang mipadayag na nga modagan mao sila si Senador Panfilo Lacson, kanhi senator Antonio Trillanes, Senador Manny Pacquiao ug gitan-aw sab si Vice President Leni Robredo.

Apan gilupig sila ni Inday Sara nga bisan wa pa mohukom nga modagan pagka presidente, daghan na ang mipadayag nga mosuporta kaniya.