Inspirasyon ang gikinahanglan

“Nganong nagluya ka man?” pangutana sa usa ka tawo nagdto sa iyang higala. Wala lang gyud motingog ang gipangutan-an ug padayon lang kin inga nitutok sa halayong bahin.  Wala siyay drive daw luya pa sa himatyong iro. Sa dihang gipangutana siya sa hinungdan ning maong maluyahong bayhon.  Apan walay ni isa nga tingog nga nigawas sa baba niini hinuon dunay mga luha nga nidagayday sa yagpis nga aping. Nasayran niya nga gibiyaan diay kini sa hinigugma. Ang linalang nga nahimong dugokan sa tanan niyang mga paningkamot.

Ang linalang nga maisip niyang kinabuhi kun inspirasyon sa iyang inadlaw adlaw nga panlimbasog.

Makaingon ta nga malisod gayud nga mahanaw ang inspirasyon.

Ang inspirasyon mao man ang kusog nga nakapadasig sa matag usa nato aron bansayon nato ang atong pagkamamugnaon.

Ang kapiskay sa matag paningkamot mahitabo gayud labina kun makita nato nga dunay padulngan ang tanang panlimbasog. Mao ni makapahimo sa tanang singot nga mabulokon kay gipatulo man alang sa mas hataas nga katuyoan. Kun kita naumol diha sa inspirasyon walay igong rason kun nganong dili kita makahatag pud og inspirasyon sa uban.

Hinuon wala kini magpasabot nga dili sa tanang higayon atong ipasundayag ang atong  mga maayong binuhatan aron makapupho kita og pagdayeg gikan sa kadaghanan.

Ang atong binuhatan maoy mosulti kun unsa ang atong bili dili kay atong garayon ang mga pulong agig pag-alsa sa atong kaugalingong dungog.

Dili kini makatabang ug labaw na nga dili kita matagbaw sanglit ang maong pasiatab ang nihilo man sa atong lunsay nga panghunahuna nga kinahanglan natong mohimo og maayo aron sa pagdayeg matugbangan dayon. Kun mao kana ang atong gihunahuna, nan, wala pa gyud kita makahamtong.