Ang Wattpad ug ako

Kining nagkatigulang na ta, ganahan gyud unta tang mobalik sa pagkabatan-on apan dunay mga lingwahe ang mga batan-on nga lisud kaayo tugkaron. Apan akong nakita nga batan-on man o edaran managsamang mahigugmaon sa sugilanon. Mao nga bisan unsa pa ang atong pangedaron padayon kitang mahigugma sa pagbasa sa mga sugilanon sa mga nagkadaiyang mga tema.

Usa ka adlaw niana, giduol ko sa usa sa akong mga batan-on dinhi dungan ang pag-ingon: “Father, ato nang himoon imong account sa Wattpad na?” natingala ko. Apan iya kong gipahinumdoman nga nagsabot na kuno mi nga himoan ko niya og account. Tuod man nahinumdom ko kay lagi buot kong mosuway nga mosuwat og sugilanon. Tuod man among gihimo ang akong account. Ug gani nagsugod nako ron sa paghimo niini. Sa akong paghimo niini naka gain na pud ko og following. Dunay hamtong kanako nangutanan kun nganong nisuwat ko sa Wattpad nga dili man ako teenager. Ako siyang gitubag ning mosunod:

1. Una, ang Wattpad usa pud ka medium aron mapakuyanap ang mensahe nga imong buot imantala.

2. Ikaduha, pamasin nga sa maong sugilanon nga pagatagikon daghan usab ang ma inspired niini.

3. Ikatulo, laay baya pud ang panahon ug anugon ang magpunay lang og tulog nga walay himoon. Ang pagsulat kun anaa ka sa mood dako man gyud kaayo og kahimoan aron mahabwa mo gikan sa imong kahiladman ang mga ideya o konsepto nga angayan nimong ipaambit.

Ang sugilanon kabahin na gyud sa kinabuhi natong mga tawo ug gani ang pagtagik niini mamahimong tambal sa atong mga kamingaw ug mga kalaay. Adunay matag narrative nga mapadangat nato makatabang man aron kita mamahimong gawasnon gikan sa mga gapos nga kanato tingali moulipon.

Sa laing bahin, ang sugilanon, mamahimong timailhan nga bisan pa man sa mga kalaay ug mga pagsulay padayon kitang buhi ug magpakabuhi pinaagi sa mga sugilanon nga atong gipaambit. Ikaw unsa man pud ang imong sugilanon sa kinabuhi?