Gigamit lang ang utok

Gitug-an ni Gobermador Gwen Garcia nga nakadawat siya og pasidaan gikan ni Gov. Presbitero Velasco, Jr. sa Marinduque ug maoy pangulo sa League of Provinces in the Philippines may labot sa plano sa duha ka mga membro sa gabinete ni Presidente Rodrigo Duterte nga pasakaan siya og kaso tungod sa wala niya pagsunod sa protocols sa IATF mahitungod sa mga overseas Filipino workers ug sa returning overseas Filipinos.

Sigun sa text ni Velasco ngadto ni Garcia, tinguha kuno nilang Secretary Harry Roque, ang tigpamaba sa Malacañang, ug ni Justice Secretary Manardo Guevarra nga ikiha si Garcia og insubordination.

Nakuha ni Velasco ang kasayuran gikan ni DILG Secretary Eduardo Año. Si Garcia di motuo nga apil ang iyang higala nga si Roque sa plano.

Apan dili na importante kinsay mga tawo nga nagpaluyo sa tinguha pagkiha ni Garcia.

Tataw ang kamatuoran nga dunay mga opisyal didto sa  kaulohan nga nasuya sa kalampusan sa gobernador sa Sugbo pagtubag sa pandemiya.

Wala ko madayod insecure lang ba sila sa gobernador sa Sugbo o may sagol politika ang ilang motibo.

Kun naguol ang mga harab sa pwesto didto sa kaulohan nga mamahimong lig-on nilang kailog sa pwesto pagka-senador si Garcia, gipasaligan na sila niini nga wa siyay plano magsenador.

Gibalik-balik na ni Garcia ang iyang pamalibad sa mga tawo nga naghulhog niya nga mokandidato pagka-senador sunod tuig. Gideklarar ni Garcia nga magpasubli siya pagkagobernador sunod tuig.

Way dautan sa mga paagi sa gobernador pagtubag sa pandemya dinhi sa Sugbo. Ug wala sab ni makalapas sa lagda sa IATF.

Hinunoa mas gipalig-on pa gani sa gobernador pinaagi sa doble nga RT-PCR  testing sa mangabot nga mga OFWs ug ROFs.

Ang tanang moabot nga OFWs ug ROFs dinhi sa Sugbo ipaubos dayon sa swab test ug sulod sa 3 ka adlaw adto sila mopuyo sa hotel o quarantine facility samtang nagpaabot sa resulta sa test.

Kun negatibo ang resulta human sa tulo ka adlaw, mahimo na nga makauli ang mga OFWs ug ROFs apan adto ipadayon sa ilang pinuy-anan ang nahabiling mga adlaw sa ilang pagkwarantina.

Human sa pito ka adlaw sukad sa ilang pag-abot ipaubos sila pagbalik sa swab test sigun sa lagda sa IATF aron gyud masiguro nga wala silay infection.

Ang dyutay lang nga kalainan mao nga inay 14 ka adlaw gyud nga pagkwarantina sulod sa mga hotel, tua na sa ilang panimay ang mga OFWs ug ROFs.

Sa ingon niini nga paagi makadaginot intawn sa gasto ang mga OFWs ug ROFs ingon man ang gobyerno nga maoy mobayad sa mga hotel pinaagi sa buhatan sa OWWA.

Gigamit lang sa gobernador ang iyang utok ug kasing-kasing ug kini namatud-ang epektibo.

Tingali angayang unahon sa mga nagpatuong mga maayong laki nga mga opisyal didto sa kaulohan ang problema sa Metro Manila inay nga manghilabot sa sitwasyon sa Sugbo.

Inanay na nga mibangon ang ekonomiya sa Sugbo ug salamat sa inantigo nga pamaagi ug liderato sa gobernador sa Sugbo.

Ug pruweba nga nibilib ang mga Sugboanon sa abilidad ni Garcia mao ang mga panawagan nga siya molansar pagkasenador.