Debate pa more

Dili pa lang dugay mahagiton kaayo ang atong pangulo nga  makigdebate ni kanhi Supreme Court Justice Carpio.

Sa dihang gisanong kini, ang nanghagit maoy nisugo kang Harry Roque nga suklan si Carpio nga mosugo pud tingali ni Pinky Web aron atubangon ang maong panagtagbo.

Makalingaw ang mga panghitabo karong mga panahona.

Ang mga butang seryoso gihimo naman lang tawon nga trivia.  Ingon ini na lang ba gyud ang atong nasud? Nahinumdom nuon ko sa drama nga sinulat kaniadto ni Fermin Collantes Gomez nga nag-ulohan Cancer ang Sakit sa Nasud!

Ning panahona mahimong ilisdan og COVID-19 ang sakit sa nasud!

Sakit nga dili gyud unta atoa apan nia usa kita sa mga nag-antos sa hilabihan.

Ug kuyog ning maong tunglo mao man ang naghinobrang pagtotoy sa dughan sa naghatag og makahilong gatas sa atong katilingban.

Nindot man ang debate. Apan alang sa unsa pa man kun tataw na kaayo nga ang hingtungdan magdumili sa pakig-asdang sa giisip niyang higala.

Alang sa unsa pa man ang tanan kun sayud kita nga it is pointless ingon man aimless. Ug labaw sa tanan usik sa panahon.

Kun basehan lamang ang mga panaad sa kagahapon, nahimong daw nabanlas na lang sa aping nga yutan-on sa dihang ni himo og pagbali ang nanaad kanhi. Gamhanan gyud ang kangitngit usahay. Kay mahimong baliktaron niini ang kahayag.

Paabot lang ta sa sunod nga moabot apan unta, atong himoong mahigmata aron mohimo og mga lakang segun sa atong mahimo sa pagbuhat og kaayohan sa atong nasud.

Hinumdomi ang gugma nga nahimong fanatic malisod kaayo buntogon kay ang uban kanila mamahimong mosunod lamang sa kapritso sa ilang giidolo bisan pa man kun kini nagkahulogan og kamatayon.