Mga balud sa kinabuhi

Ang tubig mahinungdanon kaayo sa kinabuhi ug sa kasaysayan sa matag tawo. Kini tungod kay ang tubig kinabuhi.

Sa pagsugod sa katukuran sa tawhanong kaliwatan. Ang sibilisasyon nagsukod man sa mga suba sa Tigris ug Euphrates.

Sa Ehipto ang mga halanudumong hitabo sa kinabuhi ni Moises nahitabo man sa Nile River.

Salamat sa Dios kay nahatagan gyud ko og kahigayonan nga makataak niadtong dapita.

Nakapanihapon ako sa usa restaurant duol sa Nile River ug gani nakasakay pa ako og barko nga naglibot libot sa Nile River. Salamat sa Dios maong kahigayonan!

Apan dili sa tanang higayon ang tubig pabiling lantap ug malinawon.

Dunay mga higayon nga bisan gani ang tubig nga tinubdan sa atong kinabuhi mamhimong mangtas ug mahimong kanato mobanlas. Ingon ana ang kinabuhi natong mga tawo.

Sama pananglit sa nahitabo sa mga tawo sa kapanahonan ni Noe. Daghan nila ang nangamatay.  Daghan nila ang wala makasulod sa Arka.

Ingon ini kakuyaw ang tubig labina kun iyang banlason ang mga tawong abusado sa kinaiyahan ug kalikupan, anaa gyud ang panimalos nga dili hitupngan.

Sa atong kinabuhi, nahimong daw lab-as sa atong panumdoman nga dunay mga higayon nga kita sakiton ug ang atong tawhanaong kahuyang mamahimong mantsa sa atong tinguha nga mamahimong santos ug balaan.  Tay-ugon kita ug mahimong lumsan sa mga tawo nga mismo atong gisaligan ug gilauman nga kanato mamahimong molaban.

Ang lawas nga mahimong tay-ugon sa balatian. Ang suliran nga mahimong motay-og mismo sa atong pagkatawo, kasinatian man sa balud sa kinabuhi.

Buot ko untang maligo sanglit ang kumbento daplin ra man sa dagat apan ang mga balud nga dagko kinuyogan sa hangin nga tampalasan.

Igo lang akong nagpaantaw ug namalandong sa mga panghitabo, akong nakita nga mamahimong ingon ini ang kinabuhi, dili nimo makita ang suliran kun ikaw mismo kalabot niini.