Dili man patas

Nagpabakuna na si Presidente Duterte aron nga mahimong mapugngan nga matakboyan siya og Coronavirus Disease, ug kon matakdan man gyud, dili kaayo mograbe.

Apan ang nakadaut kay lahi nga matang sa bakuna ang iyang gigamit, dili ang gi-promote niya nga Sinovac nga pinalit gikan sa China.

Ingon usab niini ang gihimo ni Mayor Edgar Labella kaniadtong Martes. Nagpabakuna ang mayor, apan sama ni Duterte, dili usab Sinovac ang iyang gigamit.

Dili man nato sila mapugngan kon dili sila gusto nga mogamit sa Sinovac, apan ang ilang gihimo ni Duterte ug Labella makapabalaka sa katawhan.

Daan na nga ang katawhan mahadlok mogamit sa Sinovac, ilabi na ang mga senior citizens, ug tungod sa gihimo nilang Duterte ug Labella, mosamot nga mahadlok gyud ang uban.

Wa man gyud hinuon pugsa ang katawhan nga magpabakuha og Sinovac, apan ang gihimo nilang Duterte ug Labella dili makapadasig sa katawhan nga mogamit og Sinovac.

Kay migamit man sila og lahi nga matang sa bakuna, mora’g duna sila’y pagduda nga makadaot sa ilang panglawas ang Sinovac.

* * *

Ugma, ilibkas na ni Mayor Labella ang “liquor ban” dinhi sa Dakbayan sa Sugbo, sa ato pa mahimo na nga ang mga tindahan makabaligya ug makapainom.

Hinuon, dunay mga restrictions nga angay’ng sundon sa katawhan, ilabi na sa mga nagbaligya og ilimnon nga makahubog aron dili sila makamulta.

Unya, kinahanglang alas 10:30 sa gabii, manirado na kay alas 11 man magsugod ang curfew nga padayong ipatuman sa kapolisan.

Arang-arang na lang hinuon kay kadtong gustong moinom sa gikamingawan nilang ilimnon diha sa public places, makainom na man, ug kadtong mga nagtrabaho sa mga imnanan, makabalik na sa pagtrabaho.

Dili gyud hinuon sama kadako ang ilang mahalin dihang kutob pa sa alas tres sa kadlawon kaniadto nga sila makabaligya sa ilang produkto. Pero, maayo na lang.

Ambot ba, wa man sa’y lami kon mag-inom ka nga ikaw ra anha sa imong balay, mas nindot man gyud nga tua ka sa public drinking places uban sa mga amigo.

* * *

Usahay, si Mayor Labella magpakuha og hulagway samtang mag-jogging ug mag-ehersisyo pinaagi sa paglakaw sa sayong buntag.

May nakabantay nga miniwang gyud ang panglawas sa mayor. Para nako, sa pangedaron ni Mayor Labella mas maayo nga ingon niana ang iyang panglawas.

Ang pangutana sa uban kon abtik ba ang mayor, dili ko makatubag kay wa na mi magkakita si Mayor Labella, ug wa na sab motubag sa akong mga text ug chat kaniya.