Walay mailad kong walay magpailad

Bisan pa man sa kadaghan sa mga modus nga nakabiktima sa daghang nga tawo aduna pa gyud gihapon ang daghan mangabiktima ilabi na kon ang hisgotan mao ang pag abroad.

Usa ka babaye ang nadakpan sa mga sakop sa National Bureau of Investigation-7 human nagpahigayon og illegal recruitment kansang mga biktima gipasaligan nga makalarga ug makatrabaho sa Singapore ug Dubai.

Misalig kaayo ang duha ka babayeng biktima kay ang usa kanhi kauban niya sa trabaho samtang ang usa classmate niya sa elementary. Kinsa ang magdahum nga ilaron sila kay hilabihan man pud kuno ka tam-is mopasalig ang suspek nga si Jovelyn Delos Trico.

Tuig 2020 pa kuno sila gipasaligan panahon pa gyud sa pagsugod sa pandemic apan naabtan nalang karong tuiga wala gyud sila ka larga, ang nakaparat kay nakahatag na sila og salapi isip bayad sa processing sa ilang paglarga.

Matud sa mga biktima nga kong makabuntis pa lang ang pasalig hagbay ra silang nanganak sa pagpinaabot, kong sa kanta pa nahaum kanila ang linya nga "gihimo lang ang saad aron lang pakyason."

Busa nagpatabang na sila sa NBI nga misangpot sa pagkasikop sa babaye apan uwahi na ang tanan kay nakuha naman ang ilang kwarta nga hinaguan, lisod ra ba ang pagpangita og kwarta karn kay pandemic man.

Mao lagi leksiyon sa mga tawo nga magpataka lang og hasmag, bisan og unsa ka suod o kaila kanang tawhan basta kwarta na ambot lang unsay resulta, dili gyud makasalig.

Dili lang ang mga mangingilad ang mabasol niini kay mao man na ang ilang linya nga mamiktima. Ang mabasol kadtong mga nagpabiktima tungod kay sa ka dako sa kwarta syaro wala sila nakahuna huna sa pagsusi sa POEA kon nakalista ba ang ngalan sa ilang recruiter ug ang ahensya niini.

Dili na kini bag-o pa kay matag karon ug unya mabalita kining ingon niini nga modus apan ang uban magpakabuta bungol marka bahala na, ug sa kataposan magmahay dayon.

Pasensiya na sa mga nabiktima sakit kining maong litanya apan mao gyud kini ang angayan nga madunggan basin nalang makapukaw kini sa mga tawo nga dili na magpailad. Ang mga mangingilad o illegal recruiter makapaynsa ra ba, maong seguradong makagawas ug makapangilad na sad sa mga tawo nga dali kaayong pasaligan.