Giapil nila og kawat si Lapu Lapu
Haskang sayona ra ni Senador Bong Go nga nakausab sa kasaysayan sa kadaugan sa Mactan nga way klarong pagtuon, way bisan unsang dokumento nga gipasikaran ug sa way pagsusi nitakdo ba sa opisyal nga kasayuran nga gidawat na sa kalibotan ug mga henerasyon sa niaging lima ka gatos na ka tuig.
Way kalainan sa kapaspas niyang makahatag og sayop nga kasayoran nga bisan masakpan nga di mao itugyan lang sa sinoholan nga troll army sa social media nga gisugo sa tulin nga pagpakatap sa bakak sa di pa makaapas ang kamatuoran.
* * *
Pareha silang Presidente Rodrigo Duterte. Kinsa gipasanginlan nga sayon ra sab kaayong niusab sa iyang middle name aron lang makapangangkon nga may dugo siyang Muslim ug nga lumad ang iyang katiguwangan sa Mindanao.
Karaang mga pamilya sa Talisay City makahinumdom ug makapakita og mga letrato sa inahan sa presidente nga nakatambong sa daghan uyamot nga mga piyesta kada Nobiyembre uban sa mga Fernandez nga iyang mga paryente. Nahibulong sila nga ang Fernandez kalit lang nga nahimong Roa dungan sa pag-insistir sa presidente nga Muslim na ang iyang inahan.
* * *
Makapasubo nga ang sayop nga mga pangangkon di kutob lang sa kaliwatan ni Lapulapu ug sa presidente. Naduhig sab ang labing importante nga mga hilisgutanan sa nasud. Sama sa iyang pasidaan nga way bisan gamay’ng sukaranan nga moulbo ang gubat kon suklan ang China sa West Philippine Sea.
Labaw pa sa sukol ang gihimo sa Vietnam ug Taiwan ug ubang kanasuran kansang nasudnong teritoryo gihasi ug giangkon sab sa China. Malampusong napanalipdan ang ilang nasudnong sobereniya nga way kaguliyang.
* * *
Tungod sa ilang kahawod nilang Presidente Duterte, Go ug kaubanan nabubo nila ang higanteng mga proyekto sa Davao ug napiskan ang ubang bahin sa Mindanao. Pero di nila mahimong kawaton ang kadungganan sa mga Oponganon pinaagi sa pagpasangil nga dayo ra sa ilang isla si Lapulapu.
Hawod silang Presidente Duterte, Go ug kaubanan kay pulos kurog nila ang tanang politiko nga andam nga mosalikway sa bisan unsang nahibilin nga kaligdong aron lang makatila sa nangluspad nilang lapalapa. Labing uwahing ebidensiya: Way opisyal sa Sugbo nga nangahas pagkurihir sa sayop nga pangangkon ni Go.
* * *
- Latest
