Ang pakigbisog nga dili matabonan

Sunodsunod nga mga kalihokan ang gipahigayon sa nagkadaiyang dapit sa nasud subay sa ika-500 ka tuig nga paghandum sa paghiabot sa nasud sa mga Katsila.

Mismo ang National Historial Commission ang nanguna niini ug gipundohan ang kasaulogan og P12 milyones. Unang gihimo ang unveiling sa mga historical marker sa mga isla sa Guiuan Eastern Samar diin unang nataak sa grupo ni Ferdinand Magellan.

Gani dinhi giila ang pagkatawhanon sa mga tawo sa isla nga nakatabang sa mga langyaw nga kaniadtong panahona nangaluya ug nangasakit tungod sa layo nilang panaw sa Pacific Ocean.

Samtang highlight mao ang pag-abot sa Spanish Navy Ship nga Juan Sebastian Elcano nga gipangalan sa kapitan sa Victoria ship nga kauban kaniadto ni Magellan.

Grandioso ang pagdunggo niini sa dakbayan sa Sugbo diin gisugat og sayaw ug sa mga dagkong opisyal sa dakbayan.

Adunay nakasaway sa mainiton nga paghangop sa nasoud sa mga Katsila kansang katiguwangan ang unang misakop sa nasud.

Bisan og malinawon ang unang panghitabo sa pagsulod nila sa Pilipinas apan mibaha usab ang dugo dihang misukol ang atong mga katiguwangan atol sa pagsakop nila.

Tinuod sila ang nagdala sa Kristyanismo sa Pilipinas diin na-convert ang mga Filipino sa pagtuo nga ilang gipaila nga maoy usa sa sentro sa 500 years celebration.

Daghan ang mga buslot ug lusot niining pagpahigayon sa paghandum diin ang usa mao ang pagsaulog kay nahimong kabahin ang Pilipinas sa labing unang circumnavigation sa kalibotan, ang ikaduha mao ang paglipang sa Kristyanismo.

Apan ang katulo maoy kiwaw o awkward nga mao ang sangka sa mga Filipino batok sa mga foreign invaders diin nibaha ang dugo aron mapanalipdan ang nasud gikan sa mga mananakop.

Kong pwede pa lang nagprotesta na si Lapu-Lapu sa gipakita nga paghangop sa mga Pinoy sa mga langyawng mananakop matud sa uban.

Seguro mi-react ang uban nganong grandioso kaayo ang pag welcome sa Barkong Juan Sebastian Elcano pag-abot sa Sugbo nga mao man kini ang nagsimbolo sa pagsakop sa mga katsila sa nasud.

Wala kini magpasabot nga nalimtan na ang atong mga katiguwangan nga miula sa ilang dugo batok sa mga banyaga.