EDITORYAL - Kristiyanismo sa Pilipinas

Karong adlawa saulogon sa Sugbo ug sa tibuok Pilipinas ang ika-500 nga kasumaran sa pagabot sa Kristiyanismo sa nasud.  Gitimaan ang pagdunggo sa Portuguese explorer nga si Ferdinand Magellan nga nagdala sa Kristiyanismo dinhi sa nasud. Agi og pagtimaan sa kasumaran, usa ka Santos nga Misa pahinungod sa pagabot sa Kristiyanismo sa nasud nga gipangulohan mismo ni Papa Francisco didto sa St. Peters Basilica didto sa Roma niadtong adlaw nga Domingo.  Gitambungan kini sa mga Filipino didto kauban si kanhi Manila Archbishop ug karon Cardinal Luis Antonio Tagle. Sumala pa sa kasaysayan, unang nasigpatan ni Magellan ang Samar niadtong Marso 16, 1521 ug midunggo sa Homonhon Island nga kabahin sa Guiuan, Eastern Samar nga iyang gipanganlan og Isla San Lazaro.

Didto sab giingong una niyang gitarok ang Krus ug giangkon ang lugar nga iya sa Espanya. Apan  dunay say mga nag-ingon nga dinhi sa Sugbu unang nipabarog ni Magellan ang Krus. Mao kini karon ang sikat kaayong “Magellan’s Cross” diha sa atbang sa Cebu City Hall ug kilid nga bahin sa Basilica Minore del Sto. Niño.

Dinhi sab sa Sugbo partikular sa Isla sa Mactan nahitabo ang nabantog nga “Bahug-Bahug sa Mactan” o ang Battle of Mactan diin gibuntog ug napatay ni Datu Lapulapu si Magellan.

Bisan sa kapildihan sa mga Espanyol mao kadto ang nagbutang sa Pilipinas sa mapa sa kalibotan.

Nahimo kadtong sinugdanan sa kolonisasyon ug ang pagkatap sa impluwensiyang langyaw dinhi sa nasud kalakip niini ang pagkuyanap sa Kristiyanismo.

Human nga si Rajah Humabon ug iyang ginsakupan dinhi sa Sugbo unang nagpabunyag isip Kristiyano.

Managlahi man tuod ang pagtan-aw sa nagkalain-laing magsusuwat sa kasaysayan sa Pilipinas, dili ikalimod nga duna kini maayong mga kabilin sa mga Pilipino.

Sa tulo ka gatos ubos sa koloniya sa Espanya naimpluwensiyahan nila ang kinabuhi sa mga Pilipino bisan sa kaniadto ug hangtud karon.

Tungod kanila, giselebrar sa mga Kristiyanong Pilipino ang Pasko, mga kapistahan sa nagkadaiyang mga santos ug mga patron, Kalag-Kalag ug uban pa nga diin nakapalig-on sa bugkos sa mga pamilyang Pilipino.