Taliwala sa dakong kahagip-ot

Dili ikalimod nga lisod gyud rong mga panahona. Tungod sa kalisod nahimong daw pakyas ang kadaghanan sa pagpahamutang sa hustong pagbati. Apan bisan pa niini, nakaako gihapon kita sa pagsaulog sa kinabuhi ingon man sa atong pagtuo.

Ngano man tuod nga atong isakripisyo ang atong pagtuo ingon man ang atong tinguha nga magsaulog agig pagpasalamat sa pagtuo nga atong nadawat 500 ka mga tuig na ang nilabay.

Mao tingali ni nga bisan pa man sa mga daghang protocols nga gilatid, daghan gihapong mga tawo ang mosaulog gihapon og mga tapoktapok aron pagtimaan sa bisan unsang okasyon.

Ang maong pagtimaan dako man og kahimoan sa negatibong bahin sa pagpakuyanap sa virus ug sa positibong bahin pagpalig-on sa relasyon.

Timailhan kini nga daghan gihapon ang morisgo aron mahatagan lang gyud og kahigayonan ang matag usa nga makapadayag sa dakong tinguha sa pakiglamibigit.

Apan mosugot ta ug sa dili lahi na gyud ang panahon karon. Lahi na gyud ang paagi nga gisud-ong nato ang reyalidad sa kinabuhi. Ingon ana gyud tingali ang tanan karon.

Apan malaumon kita nga tingali sa panahong gitakda sa Dios mahibalik kita sa naandan. Ambot lang pud kaha.

Ang kasinatian sa kahagip-ot ug kalisod nipahinumdom kanato ning mosunod nga mga hagit.

1. Ang paggamit sa bisan unsa uban ang pagkamamugnaon.

2. Dili gihapon kini babag aron kita mopaambit ngadto sa mga tawong mas nagkinahanglan pa kay kanato.

3. Ang atong presensiya sa pagkakaron dako naman nga panalangin busa angayan kitang magpasalamat nga hangtud karon buhi gihapon kita.

Salamat ang atong angayang litokon matag karon ug unya. Taliwala sa kahagip-ot angayan gihapon kitang maglipay.