Tribute ni Sir Dodong

Nakalitan ko pagkasayod nga mitaliwan na si kanhi kongresista Jose “Dodong” Gullas, nga maoy chairman sa The Freeman ug Banat News.

Nahandom nako nga usa ka higayon, mitambong si Sir Dodong sa anniversary sa The Freeman ug gialalayan nako siya pagkanaog sa hagdan gikan sa third floor.

Dako ko’g utang kabubut-on ni Sir Dodong kay kapin na sa 30 ka tuig nga nagsuwat ko sa iyang pamantalaan, ug nakat-onan nako ang iyang paagi paghimo’g miting.

Makaingon ko nga sinsero si Sir Dodong sa pagpanerbisyo, ilabi na kon alang kini sa kaayohan sa katawhan.

Dili politiko si Sir Dodong ug napugos lang siya paglansar pagka kongresista aron nga dili maputol ang pagserbisyo sa mga Gullas ngadto sa publiko.

Nakahuman na og tulo ka termino ang iyang igsuon nga si Kongresista Eddie Gullas, mao nga siya ang gihangyo nga molansar aron mapadayon ang mga proyekto sa iyang maguwang.

Tuod, midaog si Sir Dodong pagka kongresista sa Cebu’s first congressional district.

Kada Sabado, human niya’g tambong sa sesyon didto sa Kongreso, mosuroy gyud si Sir Dodong sa lainlaing dapit sa iyang distrito.

Ang reporter sa The Freeman nga mokuyog kaniya, mitug-an nako nga sa usa ka dapit, kahilakon si Sir Dodong kay ang mga bata nga moadto sa tunghaan, kinahanglan pa nga moubog sa tubig nga taga tuhod ang giladmon kay wa may taytayan ang sapa sa maong dapit.

Gisaaran ni Sir Dodong ang katawhan sa maong dapit nga maninguha siya aron katukoran og sementado nga mora’g skywalk ang maong sapa aron dili na moubog ang kabataan nga mopaingon sa tunghaan ug sa pagpauli.

Pagkahuman sa proyekto, dili na kongresista si Sir Dodong niadto kay wa man siya molansar pagbalik, apan gibalik gyud niya ang maong dapit ug giingnan ang katawhan nga natuman na niya ang iyang gisaad.

Ang dili nako makalimtan ni Sir Dodong mao nga kon makigmiting gani siya namo nga mga editors ug reporter, tutokan gyud nako siya ug pamation pag-ayo ang iyang mga gisulti, kay kalitan ka niya’g pangutana kon unsay iyang gisulti.

Sa ato pa, kon wa ka mamati niya, mauwawan ka lang kay masakpan man nga gipalapos ra nimo sa pikas dunggan ang iyang gisulti.

Unya, gibalaan usab ni Sir Dodong ang mga karaang batasan sa kabataan kaniadto nga pagka matinahuron, kon gabii na, mangatahuran gyud sa maguwang nila’g edad.

Ginaingon nga kitang tanan, moabot man gyud ang katapusan, apan sigurado ko nga bisan og wa na si Sir Dodong, ang iyang ngalan makulit na sa panumdoman sa katawhan nga nakaila kaniya.