Ikaw si Pedro ug ibabaw ning bato

Dili pa lang dugay gisaulog nato ang piyesta sa katedra ni San Pedro kun ang iyang lingkoranan. Ning maong kasaulogan dunay change of name ingon man change of role.

Gikan sa ngalan nga si Simon ngadto sa ngalan nga Pedro kuyog niini ang paghimo kaniya nga pangulo sa mga apostoles.

Ang maong kahimtang maoy nagdala kaniya sa linain nga tahas ingon nga sumusunod ni Jesus.

Apan kun buot hunahunaon si Simon Pedro dunay kahuyangan sama kanato. Nahimo siyang inila sa dihang iyang gilimod ang atong Ginoo sa makatulo.

Kadtong panahon nga anaa silang tanan sa kalisud. Hinuon dili pud kita makabasol kay survival ang anaa sa iyang hunahuna niadtong mga panahona.

Human sa iyang kabanhawan si Jesus nakigsulti kang Pedro. Gani iya kining gipangutana: “Simon anak ni Jonas gihigugma mo ba ako labaw sa tanan?”

Gipangutana kini makatulo ka higayon timaan nga seryoso ang atong Ginoo niini. Seryoso usab si Pedro sa iyang pagtubag nga gihigugma gyud niya ang Ginoo. Gipamatud-an niya kini pinaagi sa pag-ula niya sa iyang dugo.

Dunay mga higayon nga kita nahimong biktima sa atong mga kahuyangan. Bation kita og kahadlok sa mga higayon nga kita tay-ogon mismo sa atong mga kahuyang.

Daghang mga tawo ang buot mopahimulos sa atong kahuyang. Ang paghimo man sa ingon maoy makapahimo nilang gamhanan segun sa ilang hunahuna ug pagbati. Mao nga ganahan kaayo silang mosud-ong sa kahuyangan sa uban.

Apan bisan pa man niini nakita nato ang bili sa atong pagpuyo sa kinabuhing subay sa kabubut-on nga gilatid sa palad sa mga matuohon.

Tinuod malisud man tuod ang mahimong mahadlok sa atong kaugalingong mga anino, apan ang pagsagubang niini tinababangan sa grasya. Ang tanan gayud mahimo.