Candelaria ug kita

Dili pa lang dugay gisaulog nato ang piyesta sa Paghalad sa atong Ginoo didto sa temple. Kuyog sa maong pagsaulog mao man ang pagsaulog usab sa Candelaria.

Sa karaang kalendaryo gitawag kini og Candle Mass. Mao tingali na ang hinungdan kun nganong hangtud karon daghanan kanato ang magpabendita gyud og mga kandila sa matag higayon nga saulogon nato ang Candelaria.

Ang kandila ingon nga simbolo sa kahayag mahinungdanon kaayo labina kun mohimo na kita sa atong mga pag-ampo.

Nagpahibalo kin inga usa ka sagradong butang ang pagahimoon mao nga kinahanglang dagkotan ang kandila agig pagpahibalo nga kining taknaa takna nga sagrado.

Ug kay sagrado man kinahanglang matag himoon nato seryoso. Ang kawalay kaseryoso sa atong pagahimoon timailhan lamang nga dunay mga higayon nga wala nato makita ang bili sa atong gipanghimo.

Sa laing bahin, ang kandila ingon nga siga nidasig kanato sa pagpaningkamot nga mamahimo kitang kahayag usab ngadto sa uban labina ning panahon sa dakong kalisdanan.

Dunay mga higayon nga kita anaa pud sa kangitngit. Sa higayon nga kita mahisalaag wala man kini magpasabot nga dautan na gyud ta. Dunay mga higayon nga kinahanglang kita mismo ang motul-id sa atong kaugalingon ug dili nato tugotan ang uban n ga maoy magbuot sa dalan nga atong pagasubayan kay kun buot hunahunaon dili man kita kopya nila sanglit may kaugalingon man kitang siga ug taras.

Ang mahinungdanon mao ang paghimo og maayo ning panahon nato karon. Dili kita angay nga mahadlok kun sa uban dautan na lang gyud kaayo kita.

Himo lang ta sa atong himoon ingon sa gipaabot gikan nato. Ug dili tanang mga butang nga gipangbato kanato ang hatagan nato og igong pagtagad. Ang uban kanila kinahalanglang pasagdan lamang.