Kinabuhi sa mananagat

Enero 24, 2021: Ikatulong Domingo sulod sa tuig

Mga Pagbasa: Jon. 3;1-5,10/Sal. 25/1

Cor. 7;29-31/Mk. 1;14-20

Dili lalim ang kinabuhi sa mananagat. Nagkinahanglan kini og igong kaisog, kalig-on ug determinasyon. Kay kon wala ang kalig-on ug determinasyon mamahimong mas peligro ang panaw kun dili maantigong mogamit sa kaantigohan ingon man ang paggamit sa hustong pamalandong aron masayud sa angayan nga buhaton.

Kun dagko ang bawod lisud ang pangisda, ug dili sa tanang higayon nga daghan ang kuha. Ingon ana kawalay seguron ang ilang panginabuhi. Sa akong kasinatian kaniadto sa isla sa Carnaza makaingon ako nga lisud gyud kaayo ang tanan.

Ang gihimong pagpili ni Jesus sa mga unang tinun-an niya nagpasabot lamang nga siya nasayod sa ilang kapasidad. Ang kapasidad nga gipasabot niini mao man nga sila maantigong moantos ug mosakripisyo.

Nakita niya ang ilang bili labaw pa kay sa ilang pamayhon. Ingon ini ang ang kinabuhi sa mga tinun-an.

Nirisgo gyud sila. Sa dihang gitalikdan nila ang mga bugsay ingon man ang sakayan ug labaw na gyud ang ilang amahan ilang gihimong risgo usab ang ilang ekonomikanhong seguridad nga maoy gisimbolo sa ilang panagatan ug sa ilang mga amahan.

Sa laktod, ilang gitalikdan ang tanan aron lamang paghangop sa laing matang sa pagkinabuhi nga complete opposite kaayo sa ilang nakat-onan ug namat-an og buot. Ang bugtong rason, pagtuo ug paghigugma sa nagtawag kanila.

Ang discipleship tawag sa usa ka intimate relationship. Relationship tali sa master ug sa disciple.

Relationship nga pinasikad sa gugma ug sa pagtuo. Gugma nga tungod niini willing ang matag usa nga morisgo ug mosakripisyo.

Pagtuo tungod kay anaa ang pagpangankon nga dunay kamatinud-anon sa usag usa. Kun anaa ang pagtuo halayo ra gyud sa tinuod ang pagduda.

Ning panahon sa pandemiya kita gidapit nga sa makausa pa puy-an nato ang atong pagka tinun-an. Kay pinaagi lamang niini mamahimong makahuloganon usab ang tanan. Hinaut pa unta.