Dissociative

Ginaingon nga malangkubon ang atong lawas ug kalag. Kun dili maayo ang atong panghunahuna mahimong maapektuhan ang atong lawas and vice versa. Apan dunay mga higayon nga makasinati kita og disassociation. Kini mahitabo labina kun daw nahisama kita sa mere observer sa ato mismong lawas o pagkatawo.

Balatian kining sikolohikal apan mahimong sabton nato kining metaphorical. Metaphorical kay dunay mga higayon nga kita mismo nahimong wala makasabot sa atong kaugalingong kahimtang sa kasamtangan maong buot kitang molingkawas niini.

Kabahin sa maong paglingkawas mao man ang pangindahay nga unta wala na lang kita mo-exist pa niining ng kalibotana aron sa ingon walay sakit nga mahiagoman. Ang sakit nga kun buot  hunahunaon lisud kaayo dawaton kay bisan gani ang imong kaugalingon modigwa sa tumang kapikal ug kaligutgot.

Apan ning tuig 2021 bisa unsa nato og lihay mamahimong malisud ang paghimo sa ingon. Angayan natong dawaton nga:

1. Dunay pandemiya nga nahitabo. Ang pagkahitabo niini angayan lamang dawaton ug isipong kabahin na gyud sa atong inadlaw adlaw nga panlimbasog.

2. Dunay kalisod nga angayan natong pangitaan og paagi. Kay kun dili nato himoon ang paghunahuna sa bisan unsang maayo ug makaayo the more hinuon kitang makasinati og depresyon.

3. Dunay sulbad sa matag suliran.

4. Dunay tukmang panahon sap ag urong ug pagsulong batok sa atong mga kaaway.

5. Dunay mga higayon nga kinahanglan kitang mobarog kun as akita mahagba.

6. Dunay mga higayon nga bisan gani ang atong suod ug kadugo moisip kanatong dautan ug lampingasan taliwala sa kaayo nga kanila atong gipakita.

7. Dunay mga higayon nga kinahanglang buhian nato ang usa ka relasyon o kadugo labina kun nahimo na silang toxic sa atong paglambo.

Sa atong panaw ning kinabuhi mahinungdanon kaayo ang pagbalik sa tagsatagsa nato ka mga bayanan nga mao ang atong kaugalingong mga luna sa kalibotan.

Angayan lamang nga ato kining atimanon kay kun dili nato kini himoon unsaon man lamang nato pagpakabuhi nga makahuloganon?