Kung ang potassium ay mababa, kailangang uminom ng tablet

Kumunsulta muna sa doktor bago uminom ng potas­sium tablet. Ang doktor ang magbibigay ng tamang dosis at klase ng gamot kung mababa ang iyong potassium. Gabay lang ang artikulong ito.

Ito ang payo kong siguradong makapagliligtas ng buhay. Dahil ang dami nang namatay dahil sa mababang potassium.

Sayang ang mga buhay na maililigtas sa pamamagitan ng pag-inom ng tableta lang. Si Doc Liza mismo, nadala sa Emergency Room dahil sa mababang potassium.

Paano malalaman:

Simple lang po.

Magpa-laboratory test ng potassium sa dugo. Ang normal result ay mula 3.6-5.5 meq/L. Kung normal ang result mo ay wala kang gagawin.

Pero kung ang resulta mo ay mababa sa 3.6, lalo na kung mababa sa 3.2 ay delikado ‘yan. Kung may sintomas ka ng panghihina ng mga paa, pinupulikat at abnormal na tibok ng puso, ay mas delikado pa iyan.

Solusyon:

1. Dapat na uminom ng potassium tablets. Ang mayroon ngayon ay Kalium tablet or K-Lyte Tablet. Paiba-iba ang available sa botika.

2. Iniinom ang tableta isang beses o dalawang beses kada araw. Depende iyan sa baba ng potassium. Kung pa­laging mababa ang potassium mo, tuluy-tuloy ang pag-inom ng potassium.

3. I-monitor bawat buwan ang potassium level sa dugo o mas madalas pa depende sa sintomas mo. Para malaman natin ang tamang dosis ng potassium tablets sa iyo.

4. Siyempre, dapat magpasuri sa doktor tulad ng neph­rologist. Tandaan: Huwag basta-basta iinom ng potassium tablet ng walang pahintulot ng doktor. Baka masobrahan din.

Tanong: Puwede bang saging at prutas na lang ang pampataas ng potassium?

Sagot: Hindi po.

Ayon sa tanyag na nephrologist, Dr. Elizabeth Montemayor, kung mababa na talaga ang potassium, hindi na kaya ng saging, kamatis, orange at broccoli. Pang-tulong lang ito.

Kailangan po talaga ng potassium tablets para mabilis ang pagtaas ng potassium.

Tanong: Ano ang dahilan ng mababang potassium?

Sa Pilipinas, may tao talaga na bumababa ang potassium ng kusa.

Ang pangkaraniwang dahilan ay ang labis na pagpapawis, pagtatae at pagsusuka. Marami pang ibang dahilan.

Kaya mas ligtas talaga magpa-laboratory test sa potassium sa dugo.