Nahimong idlas ang pagtimbaya

Tungod ning pandemiya nga nitakboy sa kalibotan, nahimong idlas alang sa matag usa kanato ang pagtimbaya. Duyog ning maong kaidlas ang kahadlok bisan gani ang pakiglambigit sa atong isig ka ingon.

Daw sa gisilsil sa mga tagsatagsa nato ka mga hunahuna ug pagbati nga delikado gyud diay ang makighugoyhugoy ning mga panahona.  Gidili ang paghalok, ang pagbisobiso bisan gani ang paggakos. Kini tungod kay matag usa nahimong suspetsado man sa laing hugna sa coronavirus disease nga karong mga panahona atua na sa Inglatera.

Matud pa kuyaw kini nga variant kay mas dali makatakod ug way swerte mas makamatay. Hinuon tingali ang atong pamunoang nasud nihimo naman pag-ban sa mga biyahe sa kahanginan gikan sa  mga nasud nga atua didto ang COVID-19 variant nga virus.  Mao nga bisan gani ang paghikap sa kamot ginadili na kay lagi ana man ang virus nga gikalisangan.

Si Duque ug ang iyang maalamong sugyot nagkanayon nga anha pa kuno himoon ang travel ban kun anaa na ang community transmission nga kaso e di wow!

Bisan unsaon pa nato og himong normal ning tanan, ambot lang kaha kun mamahimo ba gyung mobalik kita sa atong naandan. Ang tanan alang nako duna namay linugdangan. Nahimong idlas ang pagtimbaya. Bisan gani ang pagtimbaya dili naman physical kondili nahimo naman kining long distance agig pagpanalipod sa usag usa.

Hangtud asa kutob kita maingon ini? Hangtud kanus-a kita mag-antos ug hangtud kanus-a mahugno pagsamot ang atong ekonomikanhong seguridad?

Dili pa lang dugay ang akong ig-agaw didto sa Mindanao ni-tag kanako sa hulagway sa lubong diin nahimutang ang akong apohan nga si Lola Delfina. Daghan ko og nakat-onan gikan niya isip iyang apo. Tinuod may pagka-estrikta tong apohana apan mapinanggaon siya. Gani ako usa man sa naka enjoy pag-ayo sa maong pagpangga.

Kahinumdom ko nga bisan pa man kun manimaho siyang haplas nga efficacent, siya gihapon ang akong gipangita. Iya kong sabaksabakon. Iya kong laylayan panahon nga ako masakit. Taliwad-an ko sa duruha nako ka mga apohan. Wala pa toy COVID-19 busa nahimong walay limit ang gakus ug halok niadtong mga panahona. Ingona ana mi niya kapinangga. Unta mabalik kadtong mga higayona kun mahimo pa lang.

Ning panhon sa dakong kalisdanan karon nga atong gisagubang nahimong idlas usab ang pagpakabana. Daw malisod alang kanato ang pagkahimong manggihatagon gumikan sa dakong kahadlok nga matakdan.

Malisud alang kanato ang mamahimong konkreto diha sa pagpatuman sa Balaod sa Paghigugma nga gilatid sa kahitas-an  kun kanunay kitang magdali ug kanunay kitang idlas diha sa pagpakabana.

Ang nakapait niini mao man nga diha sa atong panaw nahimong idlas usab ang uban diha sa ilang pagsabot sa imong tinud-anay nga kahimtang. Mahimong saypon ka pa sa mga tawo nga imong gihigugma.