Pagsagol sa mga bakuna
Ang bag-ong bersiyon sa kagaw nga SARS-CoV-2, nga gitumbok nga nakahimong mas mananakod sa COVID-19, posible nga makapausab sa mga lagda sa nagpadayon na nga pagpamakuna sa nagkalainlaing kanasuran sa kalibotan.
Mahimo sab nga makapausab sa mga plano sa Pilipinas ug ubang kanasuran nga wa pang kapamalit og bakuna ug nangandam pa lang sa pagpamakuna sa labing nameligro nilang mga molupyo.
Nakapatumaw ni sa lab-as nga lalis angay’ng bang eksperimentohan ang katawhan. O mas maayo nga hatagan og parsiyal nga panagang ang kinabag-an nila atubangan sa mas seryuso nga hulga.
* * *
Ang Britanya, nga maoy labing una nga nakasugod sa pagpamakuna ug mao say labing una nga nakamatikod sa bag-ong variant sa kagaw, nipahibawo na og duha ka dagkong kausaban sa ilang mga lagda:
Gamiton ang tanan nilang suplay sa bakuna sa paghatag og unang dose sa kinadaghanang molupyo nga maabot bahala na kon mas dugay nga masundan sa ikaduhang dose; ug
Mahimo nga managlahi ang mga bakuna nga mahatag sa katawhan sa una ug ikaduha nga dose, agad sa unsa nga suplay sa bakuna ang mahibilin ug magamit dayon.
* * *
Nitiyabaw dayon ang mga eksperto sa gihulagway nila nga iresponsable nga buotbuot sa Britanya bisan way gihimo nga mga pagtuon ug konsultasyon:
Nipasidaan ang mga siyentipiko sa Pfizer, BioNTech, Moderna ug AstraZeneca nga mahimong di sama ka-epektibo ang mga bakuna kon mas taas ang gintang sa una ug ikaduhang dose (gikan sa tulo ngadto sa upat ka semana ngadto na sa upat ka buwan); ug
Nabalaka sab sila nga may mga komplikasyon ang pagsagol sa managlahing mga bakuna.
* * *
Apan nipasabot ang kadagkoan sa Britanya nga mas daghan ang mangasakit ug mangamatay, moawas na sab ang ilang mga tambalanan sa pagsulbong sa bag-ong mga kaso ug mas lapad ang kadaut sa ekonomiya kon wa silay himuon dayon batok sa bag-ong variant sa kagaw.
Gipahimangnoan hinuon sa mga eskperto ang kadagkoan sa gobiyerno sa Britanya ug ubang kanasuran nga ang paglaktaw sa siyensiya ug ang kalitkalit nga pagpatuman sa makalibog nga mga lagda sa way igo nga pagpasabot mosangpot sa mas dako nga kadaot—ang hingpit nga pagtibugsok sa pagsalig sa katawhan sa mga bakuna.
* * *
- Latest
