Si San Jose ug ang iyang pagka-manggihatagon

Si Maria nakamatngon nga siya nahimong mabdos apan sa lalang sa Espiritu Santo.

Ang maong pagmabdos dunay epekto sa iyang kaugalingon.

Unang epekto niini mao man nga mamahimo siyang patyon kay ang maong kahimtang gisud-ong man ingon nga kasinatian sa pagpakaulaw.

Si Jose nakamatngon usab sa maong sitwasyon ug gani duna man siyay kahigayonan nga mahimo niyang ibulgar si Maria.

Ning paagiha, mamahimo siyang maluwas gikan sa maong kaulawan. Apan bisan pa man ning maong standard kun sumbanan, si Jose nihukom nga makigbulag na lamang siya kang Maria sa hilom.

Ang maong desisyon napakgang sa dihang pinaagi sa damgo siya gidasig sa pagpangasawa kang Maria kay ang gisabak niini lalang man sa Espiritu Santo.

Ug tuod man, gituman kini ni Jose. Iyang gipangasawa si Maria ug nakigtipon kaniya diha sa Santos nga kahadlok sa Ginoo. Ingon ana siya kamanggihatagon.

Ning panahon sa dakong pandemiya, daghan kaayo ta og nasugatan nga mga kalisdanan. Ang maong mga kalisdanan mamahimong makapahakog kanato o makaaghat kanato sa pagkamanggihatagon. Ang tinubdan sa pagbati sa kahakog mao man ang kahadlok nga mahutdan sa mga kasangkapan aron mabuhi sa paagi nga komportable.

Mahadlok kita nga mawad-an ug mahutdan. Ingon ini ang atong nasinati karon. Sa laing bahin, ang kasinatian sa kakulangan makapadasig man kanato sa paghigmata sa buhing kamatuoran nga diha lamang sa pagpanghatag kita mamahimong magpakabuhi sa sa paagi nga makahuloganon.

Kining maong makahuloganon nga kinabuhi nakatabang man kanato pagsud-ong sa kalibotan ingon nga makahuloganon usab.

Dili tungod kay may makuha kita gikan niini apan may mahatag kita ngadto kanila. Sa atong pagpadayon sa atong pagkamanggihatagon, the more kita makakita nga kita diay mga kabus.

Kuyog sa pagkamangihatagon ni Jose nagasukad usab sa iyang pagkaabli sa mensahe sa Dios. Gani sa iyang paghikatulog nahimo man siyang abli sa mensahe sa Dios pinaagi sa damgo.

Ang maong damgo sa iyang katulogon iya mang gihimong damgo usab diha sa iyang pagkahimatngon. Ingon ini siya kamadasigon ug kamanggihatagon. Iyang giangkla ang iyang mga laraw ngadto sa laraw nga Diosnon.

Kay diha lamang sa pagtuman sa kabubut-on sa Dios kita mamahimong mahingpit ug mabalaan. God’s will is the best because he is our father,” matud pang Fr. Joseph Aveni, usa ka paring Rogasyonista.

Ning  panahon sa dakong kalisdanan unta makita nato ang bili diha sa pagdamgo kay diha lamang sa pagdamgo makita nato ang mas halawom nga bili sa pagkamasinugtanon.