Daghanon na lang nato

Kini ang nakita nakong solusyon sa dihang gi-call ang among attention kalabot sa kadaghang mga tawo nga nitambong sa mga Misa ning panahon sa Pasko. Mao nga gikan sa duha ka mga Misa gabii ug kaadlawon ako na lamang ghimo kini duha sa gabii ug usa sa kaadlawon. Kini aron sa ingon mamahimong mas maka distansiya gyud ang mga tawo gikan sa usag usa.

Mao kini ang protocol. Bisan gani ang mga tawo nga sakop sa pamilya ang gidasig man nga magpalayo sa usa’g usa. Pagkalisura. Unsaon naman lang intawon ning kalakiha. Ang kaniadtong giisip natong hikap sa paghigugma nahimo naman nuong hikap sa kakuyaw ug dakong kalisdanan kun sa coronavirus simbako mataptan.

Hangtod asa kutob kining atong pagbangotan ug hangtud asa kutob kining atong dakong kalisdanan? Anaa ba ang pagsalig sa usa’g usa labina kun mismo ang tagdumala nahimong dakong bakakon ngadto sa iyang mga sumusunod? Unsaon kaha pagsumpo kining maong Plandemiya?

Sa laing bahin, matag usa nato bisan pa man kun global ang katuyoan sa pagtabang, nahimong daw micro ang nahitabong pakig-asdang. Kini tungod kay aron mapanalipdan ang tanan kinahanglang panalipdan una nato ang atong mga kaugalingon gikan ning dakong kalisdanan.

Ang kanhiay nga pagsabot nga mahimong ipadayag sa paagi nga physical ang paghigugma ato naman hinuong gihimong gisabot nga ang dili paghikap usa naman ka dalaygong akto sa paghigugma. Kun kaniadto nahimong hugpong ang tanan karon gihimong daw mag-iyahay ang matag banay o mga kahigalaan aron lagi sa maong Corona makalikay.

Unsay implikasyon niini sa atong kinabuhi?

1.    Physically nasinati karong mga panahona ang starvation of touch. Ang mga bata nga nagkinahanglan og gakus ug paghapuhap sa ilang mga ginikanan nahimong gihikawan niini. Most likely kun ugaling sila modagko mamahimo silang alien sa bili sa paghikap.

2.    Emotionally mamahimong mamanhod ang matag usa kanato. Kini tungod kay naka punting lamang kita sa kaugalingon natong mga suliran ug panginahanglan ug nahikalimot kita sa uban nga mas nagkinahanglan.

3.    Socially nahimong malisod alang kanato ang pag-connect physically kay kita sa kadagkoan gidid-an. Kun kita nahimong katag ug wala na magkahiusa nan, mamahimong mas sayon sa kaaway ang pagpukan kanato kay ang atong connection nahimong hinay gumikan sa malupigong pagbanhig sa atong kagawasan.

4.    Spiritually nahimong uga usahay ang pag-ampo. Kay diha sa dakong kalisdanan usahay makapangutana kita sa gahum nga iya sa Dios nganong nakatugot man siya nga mahitabo kini. Apan sa laing bahin mamahimong ang maong kasinatian sa dakong krisis kasinatian man pud sa espirituhanong paghigmata ug pag-amgo nga human ning mga hitabo karon anha pa kita nakaamgo sa bili sa mga naandan nga ato lamang gipasagdan sulod sa daghang mga katuigan. Lisud kaayo ning mga panahona. Lisud gyud kaayo.

Mas maayo pa nga diyotay ang magsakripisyo kaysa maangin ang kadaghanan. Mao nga ang simbahan naningkamot sa iyang kaugalingong mga pamaagi nga sa kagamhanan ug sa katawhan makatabang.