Patyon ang tanang abogado

Ang ulohan ning maong lindog akong gikuha ug gihowaman kang Shakespeare sa iyang pahinungod sa mga trial lawyers nga iyang giulohan: “The First Thing We Do, Let’s Kill All the Lawyers” (“Ang Unang Butang nga atong Himuon, Atong Patyon ang Tanang Abogado.”)  Unsa man ang buot ipasabot niini ni Shakespeare?

Kun imong basahon ang unod sa King Henry VI, Part II, (Act IV), Scene 2 diin ang pagpatay sa mga abogado migawas ,milutaw nga ang buot ipasabot ni Shakespeare mao diay ang pagpadayag sa iyang dako nga pagyukbo ngadto sa mga abogado nga maoy nag una sa pagpanalipod sa demokrasya.

Para kang Shakespeare ang unang himuon sa mga diktador nga gustong mawagtang ang kagawasan mao ang pagpatay sa mga abogado. Sa Pilipinas, 53 na ka mga abogado nga gipatay apil na ang walo ka mga huwes ug napulo ka mga prosecutors sukad niadtong Hulyo 2016. Ang ika 53 gipatay sa dakbayan sa Sugbo.

Si Atty. Joey Luis Wee gipatay samtang nagpaingon sa iyang opisina. Sa wala pa siya patya niadtong Nobyembre 23, may lain pod nga abogadong gipatay didto sa Narra, Palawan niadtong Nobyembre 17 ning tuiga. Si Atty. Eric Jay Magcamit gipatay samtang nagpaingon sa bista sa kaso nga iyang gilabanan. Siya ang ika 52 nga gipatay.

Kun imong sumadahon, sa 53 ka mga abogado nga gipatay sukad niadtong Hulyo 2016, mogawas nga napulo ka mga abogado ang gipatay matag tuig o halos usa ka abogado ang gipatay kada bulan.

Ang 53 ka mga abogado gipatay ba tungod kay ilang gipanalipdan ang demokrasya ug kagawasan?

Managlahi ang rason nganong gipatay ang mga abogado. Dunay gipatay tungod sa personal nga rason ug tungod sa kaso nga ilang gihuptan.

Hinuon nagkapariha ang rason nganong wala masulbad ang pagpatay sa mga abogado. Gipatay ang mga testigo, mga haniti ang nagpatay ug dili lig-on ang ebidensiya, matud pa ni Justice Secretary Meinardo Guevara.