Masinopakon ba gyud

Nagdasok ug nagponsisok sa mga Barangay Hall ug gyms ang mga senior citizens sa unang adlaw sa pagapod-apod sa tabang salapi gikan sa kagamhanan sa dakbayan sa Sugbo.

Una nang gipahibalo ni Mayor Edgardo Labella ngadto sa mga senior citizens nga ihatod sa ilang panimalay ang ilang tag-upat ka libo ka pesos nga madawat aron malikay sila sa makamatay nga virus.

Nganong bisan sa pahibalo sa Mayor midagsa man gihapon ang mga senior citizens sa mga Barangay Hall ug gyms ug gikompromiso ang seguridad sa ilang panglawas sa upat ka libo ka pesos lamang nga kantidad?

Ang akong pangagpas mao kini: Una, dugay nga moabot ngadto sa panimalay sa mga senior citizen ang daginoton nga gidaghanon sa mga Disbursing Officers (DO) nga mga langay-langayon kay alas dos pa gani sa hapon mamauli na sa City Hall.

Ikaduha, ang mga Senior Citizens mag-ilogay nga maoy mauna sa mga makadawat sa tabang salapi maong dili na makapaabot sa mga DO nga moabot sa ilang tagsa-tagsa ka mga panimalay. Ikatulo, mahadlok sila nga sa ilang pagpaabot walay moabot kay wala makatoltol sa ilang panimalay ang mga DO.

Ikaupat, ang mga senior citizens nakapaniid na basi sa nanglabay nga pagapod-apod sa tabang salapi nga mosuol gayod ang tapol sa mga DO nga dili na mamalik pagbalay-balay inig ka hapon ug ang mga senior citizen na ang paduolon nila sa Barangay Hall ug gym.

Ikalima, langay kaayo ang pagapod-apod sa tabang salapi tungod kay gilahogay pag-ayo ang pangalan sa mga senior citizen nga hasta ang magtiayon nga seniors dili magdungan sa pagdawat sa salapi tungod kay ang pangalan sa usa nalista sa laing DO nga toa pa sa pikas bungtod nanghatag.

Ang paagi sa pag-apod-apod sa tabang wala makamugna og kompiyansa sa mga tiguwang nga makadawat ug dili malaktawan maong nagdasok ug nagponsisok sa Barangay Hall ug gym inay magpaabot lang sa ilang panimalay.