Kinsay nag- pamayor-mayor?

Natribukar ang pag-abang sa dakbayan sa Sugbo sa kanhi Jaguar KTV diha sa Barangay Banilad isip sentro alang sa kababayen-an ug kabataan.

Way dautan niini. Apan makaiknat sa kilay ang presyo sa abang. Sigun sa kopya sa kontrata tali sa dakbayan sa Sugbo ug sa Alpha Real Estate nga giduso sa City Legal Office, mokantidad og P500 mil matag buwan ang abang sa dakbayan.

Upat ka buwan ra ang naa sa kontrata apan dunay dakong posibilidad i-renew  sunod tuig sanglit gilatid sa kontrata nga mobayad ang dakbayan og 10 porsiento nga "escalation fee" matag tuig.

Human mogawas sa media, matud ni Mayor Edgar Labella nga wala pa siya masayod niini.

Sigun niya nga wala pa moabot sa iyang buhatan ang kontrata. Wala pa sab aprobahi sa Konseho sa dakbayan ang resolution ni Konsehal Raymond Garcia nga nagtinguha paghatag og pagtugot sa mayor nga mopirma sa maong kontrata.

Ug tungod kay wala pa mahitsas ang mga dokumento, tingali wala pay kwarta sa gobiyerno nga nigawas gikan sa panudlanan sa dakbayan.

Apan ang pangutana, nganong giakupahan na sa dakbayan ang maong building?

Dihang gisusi sa The Freeman ang kanhi KTV bar nasuta niini nga gigamit na kini sa dakbayan.

Ingon niini ba ang hustong proseso sa mga transaksiyon sa gobyerno? Niagi ba ni og public bidding? Gipublikar ba sa dakbayan ang ilang panginahanglan og building nga kaabangan aron kahatagan og kahigayonan ang ubang nagpaabang og building nga makasalmot sa bidding?

Bisan unsaon og tan-aw labihan ra makahal sa presyo. Gani, mismo si Labella miangkon nga mahal ra ang tunga sa milyon nga abang. Buot gani niya nga mareview og tarang ang kontrata.

Labaw sa pag-review sa kontrata, dili kaha maayo og ipaimbistigar sa mayor kinsay nagbuot buot sa maong transaksiyon nga wala pa man diay kini moabot sa iyang buhatan?

Walay kontrata nga angayang i-review kun wala pa ni moagi sa hustong proseso. Sa laktod illegal ang kontrata kun wala ni moagi og public bidding ug way pagtugot gikan niya ug sa Konseho.

Tingali dunay nagpamayor-mayor diha sa City Hall luyo sa kasayoran sa tinuod nga mayor. Ug kini maoy angayang susihon ni Labella tungod kay makadaut ni sa iyang administrasyon.