EDITORYAL - Bakuna batok COVID-19

Nanigurado og maayo ang mga adunahang mga nasud nga makauna sa coronavirus alang sa ilang mga tawo. Dili na kini ikakurat pa tungod kay mga sapian man sila ug sagad sa mga bakuna naa sa ilang nasud gihimo.

Pagkaluoy sa mga kabus nga mga nasud sama sa Pilipinas nga kinahanglan pang mangutang aron dunay ikapalit. Mao ni ang nakapait, sa mga nasud nga dako og populasyon nga dili malambuon og ekonomiya kun itandi sa mga nasud nga gamay kaayo og populasyon apan adunahan sama nalang sa nasud sa Singapore.

Si Presidente Duterte misaad nga unahon gyud niini nga mapabakunahan ang mga vulnerable sectors ug mga kabus. Kinahanglan gyud niya kining buhaton tungod kay pagkatinuod, kaning bakuna uwahi na sa prayoridad sa mga kabus, mas unahon nila nga makakaon sa saktong oras.

Maayo man kining mga adunahan tungod kay bakuna nalay gipaabot kay naa man silay kwarta, apan ang mga kabus, bisan duna nay bakuna kun dili libre aw, kuli na kaayong ilaha kining gastohan ilabi nga gikatahong mahal kini.

Kung dili gud tagdon ug pasagdan ang mga kabus magpabilin ang daghang mga kaso tungod kay sila may naa kanunay makigdasok-dasok ug mosum-ok kung asa dunay kapangibuhian hinungdan nga naa kanunay sa ilaha ang risgo nga mataptan.

Dinhi sa Pilipinas mas daghan ang kabus itandi sa mga adunahan, kaning kabus mookupar sab og luna sa mga tambalanan sama gihapon sa maokupar sa tawong adunahan kun silang duha parehong mataptan ug maluya sa maong sakit.

Kun ingon niini ang mahitabo mameligro gihapon ang health care system sa nasud ug kalas kini og kwarta sa gobiyerno. Diha raba sab sa maong sektor nagsalig og mga trabahante ang mga adunahan ug kun sila mangasakit o ma-lockdowns, apektado sab ang mga naka-afford sa bakuna.

Maayo lang unta og makonsensiya o maluoy kining ubang mga adunahang mga nasud ug dili sila maghinakog pagdonar sab og bakuna sa mga gagmay nga mga nasud.

Sigurado gyung mauwahi ang mga gagmay’ng mga nasud sa listahan sa prayoridad sa bakuna ug tingali kun duna man, madugay-dugay pa gyud kini pagabot.