Salamat MCWD

Ang Facebook maayo kaayong mopahinumdom kanimo sa imong mga gipang-post sa nanglabay’ng katuigan.

Nasuta nako nga kagahapon maoy sumad nga usa ka tuig nga nagtagawtaw ko sa social media kay ang MCWD wa gyud makasuplay namo og tubig diri sa unahan sa Marco Polo Hotel sulod sa dugay na nga panahon.

Ang Board of Directors kaniadto kadaghanan mga tinudlo sa kanhi mayor, nga wa gyuy nahimo aron nga ilang matubag ang panginahanglan sa katawhan.

Silang tanan gipanghulipan ni Mayor Edgar Labella ug bag-ong mga sakop sa Board, ug nagtudlo usab og bag-ong manager sa MCWD.

Karong tuiga, wa na kaayo ko masakripisyo kay maayo na moserbisyo ang MCWD, moagas na ang among mga gripo, aw hinoon kaadlawon ra, apan maayo na lang kay sa wala gyud.

Unya kon dili sab moagad, makatawag dayon ko ug mohatud dayon ang trak sa MCWD. Magpasalamat ko ni Mayor Edgar Labella nga mipili og mga sakop sa Board nga maayong moserbisyo.

Salamat ni kanhi konsehal Joey Daluz III nga moaksyon dayon kon manawag mi og tabang, ug sa ubang sakop sa MCWD Board ug mga opisyal sa water district, labi na ni Engr. Michael Diola.

* * *

Awhagon diay nako ang katawhan nga magtinabangay ta, ug dili kita magsalig nga ang atong mga opisyal maoy molihok para kanato, kay dili man tanang butang ilang mahibaw-an.

Pananglit dunay mga suga nga pundir ang bombilya diha sa inyong mga dapit, ayaw na pagpaabot nga ang inyong mga opisyal sa barangay maoy makakita niini ug moatiman.

Kamo na mismo ang mohimo’g paagi nga ang mga opisyal nato makahatag og pagtagad. Sama diri sa among lugar, duha ka semana na nga wa magsiga.

Gitawgan dayon nako si Atty. Jigo Dacua, ang hepe sa Department of Public Services (DPS) kay under man niya ang Streetlighting division, ug gipasaligan dayon ko nga atimanon nila ang problema.

Kon huwaton gud nato nga makit-an ni sa mga opisyal sa barangay, basin og maabtan ta og “siyam-siyam” kay dili man manuroy ang mga konsehal sa ilang mga teritoryo.

* * *

Kadaghanan diay kuno sa mga PUJ nga nagdagan sa lainlaing mga rota sa Cebu City dili “road worthy.”

Mao diay kini ang rason ngano nga kapin pa lang sa usa ka gatus ang natugotan nga makadagan pagbalik bisan ug nga nagkinahanglan unta og mga 1,700 ka PUJ nga padaganon.

Para kanako, ang sad-an niini mao ang mga operators kay gihatagan sila og taudtaud nga panahon aron andamon ang ilang mga sakyanan, apan way gihimo. Ang ubang PUJ diha mora gyud og mga lungon nga may ligid.