Maayong pagkahagba

Human sa pipila ka dekada nga pagsulbong diin usa ang Pilipinas sa adunay labing maayong performance dili lamang sa Southeast Asia kondili sa tibuok kalibotan, gipaabot nga motiurok ang ekonomiya sa Pilipinas karong tuiga. 

Kining dili maayong balita mugna sa coronavirus disease o COVID-19 nga grabe nga miepekto sa ekonomiya sa nasud.

Gani ang Pilipinas maoy usa sa mga nasud nga adunay labing daghang kaso sa COVID-19 sa Asia.

Tungod sa COVID-19, liboan ka kompaniya, ilabina kadtong mga small-medium enterprises ang nanira tungod sa dakong pagkalugi sa dihang minus na ang mopalit sa ilang produkto o mokuha sa ilang serbisyo.

Kini wala pay labot sa higpit nga quarantine ug lockdown nga gipatuman sa nasyonal nga kagamhanan, ilabina sa mga lugar nga kuyanap pag-ayo ang coronavirus disease, nga mipahunong sa operasyon sa daghan g kompaniya.

Miresulta usab kini sa milyones nga nawad-an intawon sa ilang mga trabaho sa tibuok nasud. Ug gumikan niining high employment rate, milapad usab ang hunger incidence sa mga Pilipino karong tuiga kay lagi kulang na ang pagkaon sa lamesa.

Tungod sa COVID-19, gatusan ka libo ka mga overseas Filipino workers and nawad-an usab sa ilang trabaho ug minghoy nga mipauli sa Pilipinas.

Mao nang midugang na usab sila sa nagkataas nga numero sa mga walay trabaho sa nasud.

Miresulta kini sa grabe nga pagkunhod sa remittances sa milyones ka OFW ngadto sa ilang mga pamilya.

Dako kini og epekto sa dagan sa nasyonal nga ekonomiya tungod kay mikunhod man ang public spending gumikan sa nagkaawop nga purchasing power sa mga Pilipino.

Karon, ang usa sa mga economic rising star sa kalibotan miawop ug misukarap sa dihang naigo sa mga lala nga tunok sa coronavirus disease.

Matud sa mga ekonomista, sa ka habog nga pagkahagba sa ekonomiya sa Pilipinas, hataas pa nga panahon una kini makabangon ug mosidlak pag-usab.

Dinhi sa Southeast Asia, ang Pilipinas ang adunay grabe nga pagkalukapa sa ekonomiya sa mga nasud sa rehiyon.

Kaniadto, sulod sa nakalabay nga dekada, ang nasud maoy usa sa adunay labing taas nga economic growth. Nabale na karon ang sitwasyon.

Manghinaut na lamang kita nga sa dili madugay, magmadaugon ang atong kampanya batok sa COVID-19 ug mosikad pagbalik ang nasyonal nga ekonomiya sa daling panahon.

Kini aron sa ingon nga makabalik kita sa normal nga sitwasyon.