Solar panels nga di na ibuwad
Usa sa akong gikalingawan taliwa sa pandemiya mao ang pagsuway og taod og solar lights sa ngiob nga mga bahin sa palibot sa among bay.
Nakadangilag sa akong interes ang solar lights nga hinatag sa akong maguwang nga si Buoy. Nilahutay ang mga suga ug nagmapuslanon sud na sa pila ka buwan.
Maong wa ko mobalibad dihang nanghagad ang akong bayaw nga si Aileen sa akong asawang si Iris nga mamalit sila og solar lights.
Kay nakatabang man ang ilang napilian, nisuway ko og pamalit og dugang solar lights online.
* * *
Nasinati nako ang mga sugilanon sa akong mga higala sa kasayon ug kalisod sa pagpili og mga baligya online.
Tungod sa kadaghan sa kapilian, makapatuyang ka sa pagpangita sa labing ubos nga presyo ug labing nindot og hulagway.
Apan dakong sugal ang pagpamalit og solar lights pinasikad sa mga hulagway.
Maayo na lang nga wa pa ko mabiktima sa gipasidaan nga daghang binuang sa pipila ka online sellers.
Nangabot sa gitakda nga panahon ug pulos nisiga ang mga suga. Padayon pa ko nga naniid hangtod kanus-a ang ilang lahutay.
* * *
Labing lisod nga bahin sa pagtaod sa solar lights mao ang pagpangita sa tukmang mga dapit—angay nga makadan-ag sa bahin sa nataran nga way suga ug kinahanglan sab nga mabuwad sa tibuok adlaw aron makasuga sa tibuok gabii.
Tungod sa kalabong sa bombil nga gipakatay sa akong asawa sa among koral, nigamit ko og mga plastik nga tubo aron nga motuybo ang solar lights ibabaw sa pandong sa mga buwak ug dahon.
* * *
Human nag-uwan sa buntag ug nagdagtom sa tibuok adlaw niadtong Biyernes, nahinangop ko nga naniga gihapon sa tibuok gabii ang among solar lights.
Mahimong nakatsamba ko sa ilang nahimutangan o may nahibilin pang pundo tungod sa grabeng kainit sa nangaging mga adlaw.
Apan naghandom na ko nga mapalambo nang solar panels sa tinun-an sa engineering sa Pilipinas, nga nakadaog og contest sa Estados Unidos, nga makatipig og enerhiya bisan di direktang mabuwad sa adlaw.
Gipasalig niya nga ang solar panels mahimo nga gamiton isip bungbong, kisame ug sawog aron nga makahatag og igo nga tinubdan sa kuryente alang sa buildings ug kabalayan.
* * *
- Latest
