EDITORYAL - Ang GMRC

Sa pagsugod sa distance learning, miani og mga pagsaway ang DepEd nunot sa mga sayop-sayop nilang mga unod sa learning materials nga gipanghatag ngadto sa mga tinun-an. Ang maong mga sayop gi-post sa mga tawo diha sa social media hinungdan sa pagbaha sa mga pagsaway. Mihangyo ang DepEd sa katawhan nga unta, dili nalang ipaagi sa social media ang mga ingon niini nga kasaypanan ug misaad nga ilang tarungon ang paghimo sa mga learning modules. Tuod man, murag nilurang ang mga posts sa mga sayop.

Apan ning bag-o, giulan nasab og pagsaway ang DepEd, ning higayona, dili lang basta sayop ang hinungdan kundili pagpakauwaw ug daw pagtudlo og bastos nga kinaiya ngadto sa mga kabataan ang gireklamo.

Kini mahitungod sa artista ug pilantropong si Angel Locsin nga gihinganlan diha sa educational module nga “obese person” o tambok nga tawo.

Ang DepEd Occidental Mindoro division miangkon nga ang maong learning material giandam sa usa ka magtutudlo sa Music, Arts, Physical Education and Health (MAPEH) apan wala kini maapil sa “self-learning module developed and quality assured” sa ilang Central Office.

Ang “body shaming” o pagpakauwaw sa usa ka tawo tungod sa porma sa iyang lawas o timbang makonsiderar nga usa ka matang sa pagabuso o bullying.  Butang nga dili maayong itudlo ngadto sa kabataan.

Gipalabay ni Locsin ang insulto bahin sa iyang panglawas apan wala niya ikahimuot ang sa iyang tan-aw wa paghatag og gibug-aton sa DepEd sa implikasyon sa dili maayong pamatasan sa maong magtutudlo ug sa mga sayop nga gitudlong grammar diha sa learning material.

Unsa diay ni? Dunay ingon niana nga klase nga magtutudlo ang DepEd nga salawayon og kinaiya? Nagtudlo pagkawalay respeto sa isi’g ka tawo?

Salikwaot kaayo nga ang unang leksyon nga gitanom sa mga magtutudlo sa sayong bahin sa pagtungha sa mga tinun-an mao ang good manners and right conduct (GMRC) nga kaniadto subject pa gyud gani apan giwagtang na kadugayan sa curriculum.

Labing maayo sab nga tudloan og leksyon sa DepEd ang maong magtutudlo ug iapil pagtudlo ang GMRC kay basin nakalimot na kini.