Kasinatian ni Fr. Wen

Niay makapahinuklog nga kasinatian ni Fr. Wenefredo ‘Wen’ Q. Cueva sa Archdiocesan Shrine of St. Catherine of Alexandria, Carcar City, nga gipaambit niya sa mga nanimbahay niadtong Nobiyembre 7 sa alas 6:00 sa buntag niyang misa, birthday sa akong anak.

Matud niya, sa naasayin pa siya’g laing parokya, giimbitar siya’g magtiayon aron maoy pablesingon sa bag-ong balay nga igo ra diay niining girentahan. Nindot ang maong balay. Ug super lami ang mga pagkaon nga giandam alang sa mga bisita ug sa pari.

Sa mopauli na si Fr. Wen, gitunolan siyag sobre sa magtiayon. Pero wala niya dawata. Matud niya, sakto na kaayo ang sobra kabonggang pagkaon nga iyang natilawan. Ikaduha, dili niya kinaiya ang pagdawat og sobre agig pahalipay sa iyang pag-blessing.

Namugos ang magtiayon nga ipadawat kini, pero hugot niyang gibalibaran. Pagkaugma, gipahibalo siya sa sekretariya sa kombento nga may sobre kunong gihatag gikan sa tawong wala magpaila, diin ang sulod P15,000. Diay, gikan sa magtiayon. Mora’g nagisi ang kasingkasing sa pari. Didto iyang nakita nga may mga tawo gayod nga maoy mopasulabi ang diwa sa pagkamanggihatagon. Kay bisa’g mahimo ra man unta kini ideretso’g hulog sa love offering box, gusto gayod nga kini adto mapunta niya.

Unta, hisabtan ni Fr. Wen ang usa ka panultihon nga:  ‘Refusing an offer is a great insult.’ Kalipay baya ang bation sa tawong kinasingkasing nga mihatag. Ug kon kini balibaran, sakitan gyod! Hinuon, may dato pod kaayo nga nagpablesing niyag modernong balay nga adunay tulo ka andana ug usab tulo ka bag-ong mahalong sakyanan. Apan igo ra siyang gipakao’g Skyflakes pinaresag usa ka Tru-orange can.

Mihatag tuod og sobre, diin ang gitunolan, iyang sakristan, kinsa nagtuo nga dakog kantidad ang sulod. Pero pag-abli sa sakristan, P50 ra diay. Si Fr. Wen, okay ra. Pero ang sakristan, puwerting yawyawa! Ning Tuig 2020, gikastigo sa nagkadaiyang gumonhap ang atong nasod, gikan sa COVID-19 hangtod na sa bagyong Rolly. Ubay-ubay ang nangamatay. Halos tanang panimalay nangahapay didto sa Bicol Region. Sila nanagtiyabaw-nagpanawag og panabang.

Dinhi makita kinsang politikohang dato sa Pilipinas ang mahisama sa giasoy nga kasinatian ni Fr. Wen, nga galante kaayo mohatag, ug kinsay dawo? Atong panid-an!