Way dokumento nga gikuptan sa yuta nga kabilin sa apohan

Dear Atty. Divine,

Bag-o lang nahibaw an sa akong higala nga naa diay yuta nga kabilin ang ilang apohan nga namatay na. Apan wa silay dokumento nga gikuptan kay nasunog man ang balay sa iyang apohan kaniadto ug apil sa nasunog ang tanan nilang dokumento. Nahibaw-an lang nila nga naay yuta ang ilang apohan sa dihang  nagkuha og titulo ang akong igsuon ug nabutang man ngadto ang ngalan sa iyang apohan nga maoy tag- iya sa tapad nga lote. Ang iyang pangutana kun makuha pa ba kaha nila pagbalik ang lote nga dugay na man kining wa nila maatiman? Pagkakaron duna nay dakong building nga gitukod ang gobiyerno sa maong lote, so unsay ilang buhaton aron mabawi ang lote? Daghang salamat. —Junjun

Dear Junjun,

Ang unang buhaton sa imong  higala mao ang pagkuha og mga  dokumento sa maong yuta. Moadto siya sa Assessor's Office sa maong lugar ug mokuha siya og Certificate of Land holdings sa iyang apohan. Kun dunay yuta ang iyang lolo, mogawas na sa certification lakip na ang tax declaration number ug mao unya kini ang kuhaan  niya og certified true copy sa tax declaration. Kun naa na siyay kopya sa tax declaration, iyang tan-awon naa bay nasuwat nga title number, kun naa gani, iya sab kining kuhaan og certified true copy sa title sa Register of Deeds. Apan kun wa gani mogawas sa Certification, pwede siya moadto sa DENR or Bureau of Lands, mangayo siya og lot data sa lot number nga nakapangan sa iyang apohan basi sa title nga nakuha sa imong igsuon. Mahibaw an na niya basi sa lot data kun iyang lolo ba gyud ang nakapangan niini. Kun kompleto na siya sa dokumento , mopasaka siya og reklamo sa barangay aron pagbawi sa yuta. Kun di sila ma-settle sa barangay then adto na siya modangop sa korte. Thanks and God bless. —Atty. Divine

Alang sa inyong pangutana palihug lang sa pag email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.