Duaw sa akong mga classmates

Ni-text akong classmate nga si Fr. Tata Torres nga kun mahimo molaag silang Fr. Sherwin Ferrater sa akong nahimutangan.

Ang maong pagduaw usa man ka dakong kasinatian sa grasya kay ning paagiha magkahimamatay ug magkakuyog bisan sa daklit lang ang maong panagkuyog kahigayonan man sab sa pag-utingkay sa mga maanindot nga kasinatian sa kagahapon.

Ang pagbalik lantaw sa kagahapon dako man kaayo og kahimoan usab sa pagbalik sa tinubdan kun kagikanan sa tanan nga atong nakab-ot karon.

Ang tawo nga dili maantigong molingi sa gigikanan ang maglisud man sa pag-adto sa padulngan.

Ning panahona karon akong nakita ang akong kaugalingon nga sa hinayhinay nihamtong na gyud intawon ug natiguwang na.

Angkonon nga ang lawas nagkaluya na, ang panlantaw nahimong nihamtong ug naghatag na gyud og maayong pagtagad sa bisan unsang giisip natong molungtad. Ang paglungtad nga dili mahimong madugta diha sa mga salingkapaw nga panlantaw sa kasamtangan.

Ang pag-ampo namo ingon nga managsuon dako naman kaayo og kahimoan aron ma-affirm ang kamahinungdanon sa usa’g usa.

Kay kun dili man nato hatagan og bili ang usa’g usa unsaon man nato pagdasig sa kinabag-an aron sila mismo mo-feel nga sila bililhon usab? Bili ba kiwaw kaayo?

Mao nga maanindot kining maong initiative ug unta mamahimo kining mapadayon sa hinay hinay apan sa klaro nga paagi.

Mas maayo nga isipon ang sacramental brotherhood ingon nga mahinungdanong kabahin ug tinguha sa matag pari dili lang sa artsiyodesis kondili sa tibuok kalibotan.