Cutting of ribbon

Kini ang matawag natong usa sa mga symbolic kaayo nga kalihokan labina kun duna kitay pagabuksan. Dinhi sa amoa among gibendisyonan ang bag-ong prayer room ingon man ang bag-ong opisina. Kini agig sanong sa panginahanglan sa mga tawo ilabina kun maghisgot kita og serbisyong espirituhanon sa parokya.

Gigamit ang mga daang estraktura o gipahimutang lang ang naandang mga dapit sa parokya. Kini aron sa ingon mahatagan og igong han-ay ang tanan. Salamat sa pipila ka mga tawong mihatag sa ilang kaugalingog bahandi ug panahon ingon man inspirasyon aron sa ingon mahatagan og katumanan kining maong damgo.

Sa kinabuhi natong mga tawo dunay mga ganghaan nga angayang tak-opan ug mga ganghaan nga sa ngadto-ngadto maabli alang kanimo ug sa uban.

Anaa gyud nang transition. Anaa gyud nang kausaban. Sa matag kausaban nga masinati anaa ang kasakitan ingon man ang kahingangha. Kay lagi dunay mga higayon nga wala kita magdahum nga mahitabo kini.

Ang maong kausban maoy maghimo kanatong makasinati sa period of adjustment alang sa mga new normals sa atong kinabuhi.

Sa akong kasinatian dili pa lang dugay, nakita ko ang buhing kamatuoran sa  giingon nilang Life Begins at Forty.

 Ang maong kasinatian mao man ang hinungdan kun nganong sa mas praktikal nga paagi angayan na akong mamahimong mas hamtong na sa akong mga pagahimoong desisyon bisan gani sa mga pagkaon nga akong pagausapon.

Ang paghangop sa hinayhinay nga sa mosugot ako ug sa dili anaa gyud ang mga sakit nga kanako mohugpa. Dili na gyud ko sama kaniadto nga paspas na og linihokan.

Dili na ako sama kaniadto nga bahala na og magdugay og katulog mura lamang og walay nahitabo. Karon nakita ko ang akong kaugalingong vulnerability. Kini tungod kay ako tawo lamang ug sa ngadto ngadto sa abog na pud ako mopauli.

Sa dihang gi-cut ang ribbon ako nalipay tungod kay simbolo kini sa laing hugna sa kinabuhi sa parokya nga mao ang pagsulod sa dalan nga kinahanglanon kaayo diha sa pagsulod sa ganghaan sa kinabuhi sa pagpangalagad.

 Tingali nagkadaiyang mga tawo ang ikahibalag ning mga dapita, tingali nagkadaiyang mga tawo ang mahimo natong masinati ug mahimamat. May ikatudlo ako kanila ug sila sab mismo may ikatudlo usab alang kanako.