Nakita ko ang akong kahuyangan

Kini ang akong nakita sa akong kaugalingon sa dihang ang akong lawas misurrender na. Nakita ko ang akong kahuyangan ug ang dakong panginahanglan sa uban nga magpakabana.

Nalipong ko ug nisuka ug daw ang akong palibot nituyok libot kanako.

Nakaingon ko basin ug kini na ang ang akong katapusan. Nawad-an ko og umoy. Ang maong kasinatian nagtukmod kanako sa pag-amgo ning mosunod:

1. Una, ang kahimatngon nga ako diay mismo nga taglawas walay igong disiplina sa akong kaugalingon. Kay lagi ang mga parokyano mahigugmaon mao nga andam ug tagana sila nga mohatag kun unsay lamian alang nako apan ang pagpatuyang sa lawas moresulta gyud ug makiangayong pagpaningil gikan niini.

Kun unsa ang imong gitanom mao usab ang imong maani. Sama kini sa bangko kun unsay imong gi deposito mao usab ang imong ma withdraw.

2. Gawas sa pagkaon, ang maong kasinatian nagdapit kanako sa pag-amgo sa bili sa paghinay sa bisan unsa nga pagahimoon.

Naandan nako ang paspas nga  kinabuhi. Laay alang nako ang bisan unsang langay. Kini tungod kay sama sa kadaghanan ako mang gitandi ang paspas sa bisan unsang kalampusan samtang ang hinay usa man ka dakong kapakyasan.

3. Ang pag-amgo sa bili sa pag-atiman sa atong isigkaingon.

Ang ilang yano apan matinud-anong pag-atiman dako man kaayo og kahimoan aron makita ko ang bili sa pagpadayon diha sa pag-amping sa akong kinabuhi bisan ning paagiha lamang.

4. Dili tanang lamian magdala og katagbawan dunay uban nila magdala og kamatayon mao nga kinahanglang mag-amping sa gihapon.

5. Salamat sa Ginoo nga bisan sa maong hitabo nia buhi gihapon ako karon ug padayong nakasulat ning maong lindog.

Kahigayonan kini nga mas doblehon pa ang pag-ampo ug pagmatngon kay ang lawas templo man sa Espiritu Santo ug kay templo man kinahanglang atimanon aron dili mamahimong ulaw sa tinud-anay nga tag-iya nga mao ang Dios.

Mao nga sleep well, eat healthy diet ug exercise regularly.

o God be the glory! Sa laing bahin, itunol ko ang akong pahalipay sa mga bag-ong kaparian alang sa Artsidyosesis sa Sugbo  nga giordenahan niadtong Septiyembre 17, 2020 sa may Metropolitan Cathedral! Congrats brothers and welcome!