EDITORYAL - Physical distancing gyud

Duna karoy plano ang Department of Transportation nga luag-luagan ang kaestrikto sa physical distancing sud sa mga pangpublikong pasaheroan apan dili ba hinuon kini maoy makaingon sa paspas nga pagkatap balik sa virus?

Ang hugot nga pagpatuman sa social distancing nga kabahin sa health protocols nunot sa pandemiya sa Covid-19 nakatabang og dako sa pagpamenus sa mga natakboyan.

Ang usa sa rason nganong gustong paluagan ang social distancing sa mga pasaheroan mao kining kakuwang sa masakyan sa publiko.

Daghang mga tradisyonal nga pasaheroan ang wala na tugoti pang makapamasahero gumikan sa ilang kakaraan.

Ang gobiyerno milusad og modernisasyon sa public transport system sa nasud ug hinayhinay nga gi-phase out ang mga karaang pasaheroan ug hinayhinay nga gipaila ang modernized jeepneys ug electric jeeps.

Apan sa dihang nagka-pandemiya ug gipahunong ang tanang matang sa pagpamasahero, wala na makabalik hangtud karon ang tradisyonal nga pasaheroan ug ang nagdagan mao nalang ang mga bus ug minibuses apan dil kini paigo. Importante kaayo nga dunay epektibong mass transport karong panahon sa pagbangon ug mapatuyok og dali ang ligid sa ekonomiya.

Apan kinahanglang tun-an kining sugyot sa DOTr tungod kay una sa tanan, wala pay bakuna batok sa Covid-19, ang maong pandemiya maoy hinungdan nga nikamang ang ekonomiya sa nasud.

Dili ba kaha hinuon tungod sa pagpasakay og mas daghang pasahero mas modaghan og balik ang mga kaso sa Covid-19? Tungod lang kay gustong mas daghan ang mapasakay isakripisyo na hinuon ang kaluwasan?

Gibasehan ug gitimbang-timbang ba kaha sa DOTr ang mga numero sa DOH bahin sa gidaghanon sa mga natakboyan ug sa nangaayo gikan sa maong sakit ug kasamtangang kapasidad sa mga tambalanan kada adlaw?

Sa pagkakaron, nikubos na tinuod ang gidaghanon sa mga bag-ong kaso apan dili tungod kay lig-on na ang resistensiya sa mga tawo batok sa Covid-19 kondili resulta kini higpit nga pagpatuman sa social distancing ug uban pang health protocols.